बाह्रदशी । 

अन्य पार्टी परित्याग गरी तीन सय ५० जना वढिले नेपाली कांग्रेसमा प्रवेश गरेका छन् । पार्टी प्रवेश गर्नेलाई नेपाली काङ्ग्रेसका नेता कृष्णप्रसाद सिटौलाले स्वागत तथा प्रवेश गराएका हुन् । 

 नेपाली कांग्रेसका बाह्रदशी गाउँ समितिले आयोजना गरेको पार्टी प्रवेश तथा वनभोज कार्यक्रम शनिबार बाह्रदशी ५ स्थित पाथीभरा पशुपालन कृषि फर्म प्रङ्गणमा सम्पन्न  भएको हो।

नेपाली काङ्ग्रेसका नेता कृष्णप्रसाद सिटौलाको प्रमुख आतिथ्यमा भएको पार्टी प्रवेश कार्यक्रममा  राप्रपा, नेकपा एमाले, माओवादी केन्द्रका कार्यकर्तालाई पार्टीको सदस्यता हस्तान्तरण गर्दै पार्टी प्रवेश गरेको बाह्रदशी काङ्ग्रेस सभापति इन्द्र बस्नेतले जानकारी गराए  । पार्टीको सदस्यता बितरण गर्दै नेता सिटौलाले पैसाको लागि होइन निष्ठाको राजनीति गर्न कार्यकर्तालाई आह्वान गरेका छन् ।

बैशाखमा हुन लागेको स्थानीय निर्वाचनको लागि सक्रिय भएर लाग्न समेत नेता सिटौलाले नेता कार्यकर्तालाई निर्देशन समेत दिएका थिए । पार्टीमा नव प्रवेशीमा राप्रपा ३ नम्बर वडाका  सभापति पंकज आचार्य, क्षेत्रीय  सदस्य टीकाराम कटुवाल, मिलन तामाङ, लोकनाथ संग्रोला, पुर्व शिक्षक सियाराम यादव लगायतले नेपाली काङ्ग्रेसमा प्रवेश गरेको बाह्रदशी कांग्रेस सभापति इन्द्र बस्नेतले बताए  ।

 काङ्ग्रेस जिल्ला सभापति देउमान थेबे, सचिव नवीन बिमली, बाह्रदशी गाउँपालिका अध्यक्ष, उपाध्यक्ष तथा बाह्रदशी, हल्दिवारी, बिर्तामोड – १० का लगभग एकहजार ५ सय कार्यकर्ताको उपस्थित रहेको थियोे ।