विर्तामोड । 

नेपाली कांग्रेसका नेता विजयकुमार गच्छदारले कांग्रेसलाई बलियो र एकजुट बनाउन प्रत्येक नेता कार्यकर्तालाई आफैंबाट शुरु गर्न सुझाव दिएका छन् । नेपाली कांग्रेस कोशी प्रदेश प्रशिक्षण विभागको आयोजना र नेपाली कांग्रेस झापाको ब्यवस्थापन एवं नेपाली कांग्रेस झापा प्रशिक्षण विभागको संयोजनमा विर्तामोडमा आयोजित प्रशिक्षक÷प्रशिक्षण कार्यक्रमलाई आज (बुधवार) जिल्ला पार्टी कार्यालयमा सम्बोधन गर्दै नेता गच्छदारले यस्तो सुझाव दिएका हुन् । 

‘कांग्रेस के हो ? सिद्धान्त के हो ? विचारमा अडीग छ कि छैन ?’ यी विषयलाई प्रशिक्षणमा समेट्न आह्वान गर्दै नेता गच्छदारले भने ‘कांग्रेसलाई ठिक ट्र्याकमा हिडाउन गारो छ, गुट उपगुट समाप्त पारेर एकजुट होऔं, एकतामा नै शक्ति छ ।’ पार्टी अनुशासन र आचारसंहिताको पालना केन्द्रदेखि टोलसम्मकै नेता÷कार्यकर्ताले पालना गर्नुपर्ने बताउँदै नेता गच्छदारले कांग्रेस पार्टीको विधान ‘पे्रसिडेन्टियल सिष्टम’ मा रहेको बताए।

सिकाइको क्रम निरन्तर चलिरहने बताउँदै उनले कोही पनि कहिल्यै कुनैपनि विषयमा दक्ष नहुने भनाई राखे। प्रशिक्षणमा सिकेको सिप, पार्टीको इतिहास, वर्तमान र सैद्धान्तिक विषयवस्तुलाई वडा टोलसम्म पु¥याउन उहाँले प्रशिक्षार्थीलाई आग्रह समेत गरे ।

कार्यक्रमका विशेष अतिथि तथा संविधानसभा सदस्य सुधिरकुमार शिवाकोटीले कार्यकर्ता प्रशिक्षित नहुँदा विपक्षीले गरेको आलोचनालाई पत्याइदिनुपर्ने बाध्यता रहेको बताउँदै गाउ/नगर, वडा र टोलसम्म प्रशिक्षण कार्यक्रम विस्तार गर्न आग्रह गरे ।

नेपाली कांग्रेस केन्द्रीय सदस्य महेन्द्राकुमारी सुब्बाले आगामी निर्वाचनमा कांग्रेसले एक्लै चुनाव लड्नुपर्नेमा जोड दिदै पार्टीले गरेका कामको ब्यापक प्रचार गरिदिन पत्रकारलाई आह्वान गरिन्।

अर्का केन्द्रीय सदस्य सुशिला ढकाल आचार्यले कांग्रेसले हिजो के ग¥यो ? आज के गर्दैछ र भोली के गर्छ ? भन्ने कुरा सबै जनतामाझ पु¥याउन प्रशिक्षणलाई प्रभावकारी रुपमा सञ्चालन गर्नुपर्ने बताइन् । 

कार्यक्रममा अर्का केन्द्रीय सदस्य गोमा भट्टराईले सामाजिक सञ्जालदेखि चिया पसलसम्म हुने पार्टीप्रतिको आलोचना चिर्न प्रत्येक नेता कार्यकर्तालाई  प्रशिक्षित गर्नुपर्नेमा जोड दिइन् ।

नेपाली कांग्रेस कोशी प्रदेश सभापति उद्वव थापाले पार्टीको केन्द्र, प्रदेश एवं प्रशिक्षण विभागले समयसान्दर्भिक प्रशिक्षण सञ्चालन गरिरहेकोमा खुशी ब्यक्त गरे ।

नेपाली कांग्रेस कोशी प्रदेश उपसभापति एवं प्रदेश प्रशिक्षण विभागका संयोजक रमेशजंग रायमाझीले १४ वटै जिल्लामा प्रशिक्षक प्रशिक्षण कार्यक्रम सञ्चालन गरिने जानकारी दिदै प्रशिक्षक उत्पादन गरेर वडातहसम्म प्रशिक्षण पु¥याउने लक्ष रहेको बताए।

झापाका सभापति देउकुमार थेवेले पार्टीका गतिविधिलाई तिब्रता दिदै पार्टीको नीति, सिद्धान्त र आचारसंहिता अनुकुल चल्न प्रशिक्षण प्रभावकारी हुने धारणा राखे।

नेपाली कांग्रेस झापा प्रशिक्षण विभागका संयोजक केशवराज पाण्डेको सभापतित्वमा सम्पन्न उद्घाटन समारोहको सञ्चालन पार्टी सचिव कृष्ण हुमागाईले गरेको कार्यालय सचिव जयकुमार दाहालले जानकारी दिए।

पार्टीका सूचना तथा सञ्चार विभाग प्रमुख मिन विश्वकर्मा, महिला विभाग प्रमुख पुष्पा भुषाल, विरेन्द्र शाहले नेपाली कांग्रेसको इतिहास र सांगठनिक संरचना, समसामयिक राजनीतिक सवालहरु र सकारात्मक सोच, धारणामा परिवर्तन लगायतका विषयमा प्रशिक्षण दिएको कार्यक्रममा  एकसय बढीको सहभागिता रहेको सूचना तथा प्रचार विभाग प्रमुख रश्मिशेखर सुवेदीले जानकारी दिए।