बिर्तामोड । 

झापाको बिर्तामोड–३ मा निर्माणधिन धार्मिक बिद्यालयका रुपमा दर्ता रहेर सामुदायिक बिद्यालयका रुपमा सञ्चालित मदरसा तालिमूल कुरान आधारभूत बिद्यालयलाई आर्थिक सहयोग जुट्न थालेको छ । सामाजिक ब्यक्तित्वहरुले निर्माणधिन भवनको जग्गा खरिदका लागि २ लाख २१ हजार १५१ रुपैयाँ आज प्रदान गरेका छन् । 

सामाजिक ब्यक्तित्वहरुले आज (आइतवार) बिद्यालयमै पुगेर सहयोग रकम हस्तान्तरण गरेका हुन् ।  सामाजिक ब्यक्तित्व सुवास भट्टराईले ५१ हजार, कुमार बुढाथोकीले ३१ हजार, युवराज निरौलाले २५ हजार, सोहनलाल राजवंशीले २५ हजार, डम्बर देउजाले २५ हजार रुपैयाँ सहयोग गरेका छन् । 

यसैगरी  त्रिलोचन प्रसाईं १५ हजार ५१ रुपैयाँ, मदन रसाईली ११ हजार १००, सुनिल शिवाकोटी ११ हजार, राजेन्द्र लिङ्गदेन ११ हजार, अम्बिर लिङ्गदेनले ११ हजार र कोशिस घिमिरे ५ हजार रुपैयाँ सहयोग गरेको बिद्यालयका अध्यक्ष अफरोज खानले जानकारी दिए । सहयोग गर्ने दाताहरुलाई धन्यवाद दिदै अध्यक्ष खानले अन्यलाई पनि सहयोगका लागि अपिल गरेका छन् ।

बिर्तामोड–३ मा चार कठ्ठा जग्गा खरिदको प्रक्रिया अगाडि बढाएर उक्त जग्गामा दाताहरु, स्थानीय, प्रदेश र संघीय सरकारको आर्थिक सहयोगले बाराबेरा र भवन निर्माण शुरु गरेको बिद्यालयलाई आर्थिक सहयोग जुट्न शुरु भएको हो । आर्थिक अभावकै कारण पूरा जग्गा खरिद गर्न र भवन निर्माण गर्न नसकेको बिद्यालयको जग्गा खरिदका लागि सहयोग प्राप्त भएको छ । 

हाल एक कठ्ठा ११ धुर जग्गा मात्र बिद्यालयको नाममा पास भइसकेको र २ कठ्ठा ९ धुर जग्गा पास गर्न बाँकी रहेको बिद्यालयका अध्यक्ष अफरोज खानले जानकारी दिएका छन् ।  उक्त जग्गा खरिदका लागि सामजिक ब्यक्तित्वहरुले सहयोग गरेका छन् ।