• विनोद सापकोटा

झापा  । 

नेकपा एमाले मोरङको अध्यक्षमा अजम्बर राई निर्वाचित भएका छन्। पार्टीको १० औं जिल्ला अधिवेशन पछिको निर्वाचन प्रक्रियाबाट नेता बिनोद ढकालको समूहबाट राई अध्यक्षमा निर्वाचित भएका हुन् । ढकालको समूहबाट पदाधिकारीका सबै उम्मेदवारले बाजी मारेका छन्। नेकपा एमालेको संस्थापन अर्थात् ओली समूह ले मोरङमा हार बेहोर्नुपर्यो।

अध्यक्ष पदमा निर्वाचित उम्मेदवार राईले ४४६ मत प्राप्त गरे । उनका निकटतम् प्रतिद्धन्द्धी संस्थापन समूह समर्थित राजकुमार ओझाले ४०७ मत प्राप्त गरेका छन् । राईले ओझालाई ३९ मतान्तरले पराजित गरे । अध्यक्षका दुवै उम्मेदवार सुन्दरहरैचाका हुन ।

उपाध्यक्षमा सागर थापा निर्वाचित भएका छन् । उनले ४२२ मत प्राप्त गरेका छन्। । उनका निकटतम प्रतिद्धन्द्धी शान्ति लिम्वुले ३९१ मत प्राप्त गरे । लिम्वु निवर्तमान संगठन कमिटी उपाध्यक्ष हुन् ।

सचिवमा सोमराज थापा निर्वाचित भएका छन् । उनले ४६२ मत प्राप्त गरे । उनका निकटतम प्रतिद्धन्द्धी रविन थापाले ३६८ मत  प्राप्त गरेका छन् । थापा निवर्तमान उपसचिव र रविन थापा निवर्तमान सचिव थिए ।

उपसचिवमा सन्तोष बान्तवा राई निर्वाचित भएका छन् । उनले ४९० मत प्राप्त गरेका छन्। उनका निकटतम प्रतिद्धन्द्धी इर्जालाल राजवंशीले ३११ मत ल्याएका छन् । महिला उपसचिवमा उषा झा निर्वाचित भएकी छन् । झाले ४१८ मत ल्याइन । उनकी निकटतम प्रतिद्धन्द्धी शिल्पा निरौला कार्कीले ४०५ मत प्राप्त गरेकी छन् । झा जिसस उपप्रमुख र कार्की विराटनगर महानगर उपप्रमुख हुन् ।जिल्ला सदस्यहरुको भने मतगणना जारी छ ।

१६५ सदस्य कार्यसमितिका लागि भएको निर्वाचनमा यसअघि ७१ जना निर्विरोध निर्वाचित भएका थिए । फागुन १७ देखि शुरु देखि अधिवेशनमा ९११ प्रतिनिधि मध्ये ८८८ जनाले मतदान गरेका थिए ।