सुरुङ्गा । 

झापाको कनकाई नगरपालिका–६ मा वडाध्यक्ष पदको लागि मतदान शुरु भएको छ । आज (आइतवार) बिहान ७ बजेबाट  मतदान शुरु भएको हो । मतदान स्थल तोकिएको कनकाई–६ स्थित चम्पापुर माध्यमिक विद्यालयको दुईवटा मतदान केन्द्रमा मतदान शुरु भएको जिल्ला निर्वाचन अधिकारी तुलसी नेपालले जानकारी दिए । त्यहाँ २०५८ जना मतदाता रहेका छन् भने वडाध्यक्षका लागि ९ जनाले उम्मेद्वारी दिएका छन् । 

जनप्रतिनिधिको मृत्यु वा राजीनामाका कारण रिक्त बनेका स्थानीय तहका पदमा आइतबार उप–निर्वाचन भइरहेको छ । नगरपालिका प्रमुख १, उपप्रमुख १, गाउँपालिका अध्यक्ष २, उपाध्यक्ष ४ तथा वडाध्यक्ष ३३ गरी ४१ पदका लागि उप–निर्वाचन गरिएको हो ।

निर्वाचन आयोगका अनुसार उप–निर्वाचनमा २० राजनीतिक दलका र स्वतन्त्रसमेत गरेर ३ सय ७६ जना उम्मेदवार छन् । उप–निर्वाचन हुने स्थानीय तहमा २ लाख २६ हजार ७ सय ९९ मतदाता छन् ।

१ सय ६२ मतदान स्थलमा २ सय ९३ मतदान केन्द्र बनाइएको छ । मतदानका लागि आज बिहान ७ बजेदेखि साँझ ५ बजेसम्म समय तोकिएको छ । मत हाल्न मतदाता परिचयपत्र लिएर मतदान केन्द्रमा पुग्नु पर्नेछ ।

मतदाता परिचयपत्र नरहे परिचय खुल्ने नागरिकता, राष्ट्रिय परिचयपत्र, सवारी चालक परिचयपत्र, राहदानी वा स्थायी लेखा नम्बर भएको परिचयपत्रका आधारमा मतदान गर्न मिल्ने आयोगले जनाएको छ ।