झापा ।  

झापाको दमक नगरपालिका वडा नम्बर २ बाट लागू औषधसहित चार जनालाई प्रहरीले पक्राउ गरेको छ ।  पक्राउ पर्नेमा दमक २ का ४३ बर्षिय नेत्र थापा, सोही स्थानका २६ बर्षिय भेषबहादुर भुजेल, १९ बर्षिय किरण थापा र दमक–५ का २६ बर्षिय प्रकाश लिम्बु रहेका छन् । 

हिमालय माबि नजिक बाटोमा लागूऔषध बिक्री बितरण गर्दै छन् भन्ने विशेष सुचना पाएपछि प्रहरी टोली उक्त स्थानमा पुगेको थियो । उनीहरुलाई गएराती १० बजेको समयमा ब्राउन सुगरसहित नियन्त्रण गरिएको हो । 

उनीहरुले बोकेको स–सानो प्लाष्टिकको पोकामा ब्राउन सुगर ३० पोका फेलापारी  तत्काल डिजिटल तराजुमा तौल गर्दा प्लास्टिक सहित ७ ग्राम ५१० मिलिग्राम ब्राउन सुगर फेला परेको प्रहरीले जनाएको छ । उक्त लागूऔषधसहित उनीहरुलाई तत्काल नियन्त्रणमा लिएर सो सम्बन्धमा थप अनुसन्धान भइरहेको जिल्ला प्रहरी कार्यालय झापाले जनाएको छ ।