झापा । 

 झापाको बिर्तामोड नगरपलिका वडा नम्बर ५ भद्रपुर रोडबाट ब्राउन सुगरसहित एक जनालाई प्रहरीले पक्राउ गरेको छ । बिर्तामोडस्थित भद्रपुर रोडमा शंकाष्पद अवस्थामा हिडडुल गरी रहेको अवस्थामा बुधवार (आज) दिउसो सोही स्थानका २० बर्षिय राज राजवंशीलाई प्रहरीले पक्राउ गरेको हो । 

शंका लागेर राजवंशीलाई खानतलासी गर्दा उनले लगाएको पेन्टको दाहिने गोजिमा खुकुरी चुरोटको खोल भित्र लुकाई छिपाई राखेको अवस्थामा लागूऔषध ब्राउन सुगर स–साना प्लाष्टिकको पोका थान–४ मा प्लाष्टिक रहित १ ग्राम ३३० मिलिग्राम ब्राउन सुगर फेला परेको प्रहरीले जनाएको छ । 

उनलाई उनका साथमा रहेका सामानसहित इलाका प्रहरी कार्यालय अननारमनीबाट खटिएको प्रहरी टोलीले पक्राउ गरेको हो । पक्राउ परेका उनको इलाका प्रहरी कार्यालय अनारमनीमा ल्याएर थप अनुसन्धान कार्य भइरहेको जिल्ला प्रहरी कार्यालय झापाले जनाएको छ ।