झापा। 

रुपन्देहीमा यात्रुबाहक बस दुर्घटना हुँदा २० जना घाइते भएका छन् । काठमाडौंबाट दाङ जाँदै गरेको यात्रुबाहक बस रुपन्देहीको देवदह नगरपालिका वडा नम्बर ८ भलुही भन्ने स्थानमा दुर्घटना भएको हो । दुर्घटनमा घाइतेहरु मध्ये दुई जनाको अवस्था गम्भीर र ५ जनाको अवस्था मध्यम रहेको जनाइएको छ ।

बा.प्र.०३–००१ नम्बरको बस गएराति पौने १२ बजेतिर सडकबाट करिब ३/४ मिटर तल पल्टिएको थियो । बसमा सवार ३८ यात्रुहरु मध्ये २० जना घाइते भएको जिल्ला प्रहरी कार्यालय रुपन्देहीले जनाएको छ । 

दुर्घटनाको जानकारी पाएलगत्तै प्रहरी निरीक्षक डाक्टर प्रसाद चौधरीको नेतृत्वमा १० जनाको टोली र वडा प्रहरी कार्यालय बुटवलबाट प्रहरी निरीक्षक महेश पाठकको नेतृत्वमा ७ जनाको टोली उद्धारमा खटिएको थियो ।

बस चालक प्युठान झिमरुकका प्रदीप परियारलाई प्रहरीले नियन्त्रणमा लिएको प्रहरीले जनाएको छ । घाइतेहरुको उपचार देवदह मेडिकल कलेजमा भइरहेको जनाइएको छ ।