बिर्तामोड । 

झापाको बिर्तामोड नगरपालिकाले वडा नम्बर ३ स्थित बिर्ता बजारमा अनुगमन गरेको छ । नगर उप प्रमुख नगेन्द्रप्रसाद संग्रौलाको नेतृत्वमा मंगलबार खाद्यन्न तथा मासु पसलहरुको अनुगमन गरिएको हो । अनुगमनमा केहि डेट एक्सपायर पेय पदार्थ फेला परेको थियो । 

अर्विन आछामेले सन्चालन गरेको अम्बिका किराना पसलमा भारतीय ब्राण्डको केहि थान ‘निम्बु फ्रेस’ म्याद नाघेको तर बिक्रीका लागि राखिएको फेला परेको थियो । अनुगमन टोलीले म्याद नाघेको अखाद्य वस्तु जफत गरि आगामी दिनमा यस प्रकारको गल्ती दोहोरिन नदिन सचेत गराएको छ ।

त्यस्तै गणेश फ्रेस हाउस दुर्गन्धित रहेको पाईएकोले सरसफाईमा ध्यान दिन निर्देशन गरिएको छ । अनुगमनका क्रममा अधिकांशले नगरमा व्यवसाय दर्ता नगरेको, नविकरण नगरेको र मुल्य सूची ठिक ठाउँमा नराखेको फेला परेको थियो । उनीहरुलाई नगरपालिकामा आवश्यक कागजातसहित ३ दिन भित्र हाजिर हुन निर्देशन गरिएको छ । 

नगर उप प्रमुख संग्रौलाले अनुगमनलाई नियमित गरिने जानकारी दिए। जनताको स्वास्थ्यलाई असर गर्ने अखाद्य वस्तु विक्री नगर्न उउले सबैलाई आग्रह गरे । नगर उप प्रमुख संग्रौलाले बजारमा अखाद्य वस्तु वेचेको प्रमाण सहित सुराकी गर्नेलाई नगद ५ सय रुपैयाँ पुरस्कार प्रदान गरिने पनि बताएका छन् ।

बजार अनुगमनमा कार्यपालिका सदस्य तिला गौतम, संगिता सिवा, वडा नम्बर ३ का वडा सदस्य हरि बांस्कोटा, नगरका राजस्व शाखा प्रमुख पदम घिमिरे, बिर्तामोड उद्योग वाणिज्य संघका सदस्य गुन्जन प्रसाई लगायत जनप्रतिनिधि तथा जनपथ प्रहरी र नगर प्रहरीको सहभागिता रहेको थियो ।