शिवसताक्षी । 

नेपाली कांग्रेस शिवसताक्षी नगर समितिको नगर सम्मेलन आइतवार (आज) सम्पन्न भएको छ । नेपाली कांग्रेसका महामन्त्री एवं प्रतिनिधिसभा सदस्य गगनकुमार थापाले गमलामा रोपिएको बिरुवामा पानी हालेर नगरसभाको समुद्घाटन गरेका थिए ।

कार्यक्रमका प्रमुख अतिथि समेत रहेका नेता थापाले आजका युवाको भविष्य सुनिश्चित गर्न नेपाललाई आर्थिक रुपमा समृद्ध बनाउनु पर्ने बताए । ब्यवस्था परिवर्तनका लागि गरिएको आन्दोलन सफल भएको बताउदै उनले नेपालमा अब प्रत्येक नागरिकको अवस्था परिवर्तनका लागि आर्थिक समृद्धिका एजेन्डासहित सार्थक आन्दोलनको आवश्यकता औल्याए ।

हरियो पासपोर्ट बोकेर त्रिभुवन बिमानस्थलबाट बाहिर जादा जुन देश गएपनी उध्योगपती बिनोद चौधरी र सडकमा मकै पोल्ने नागरिकको परिचय एउटै ‘नेपाली’ हुन्छ भन्दै नेता थापाले सबैको समान आर्थिक अवस्था र नागरिकको जीवन परिवर्तनका लागि नेपाललाई समृद्ध बनाउनु पर्नेमा जोड दिए ।

कार्यक्रममा नेपाली कांग्रेस झापाका सभापति देउकुमार थेबे, पूर्व जिल्ला सचिव सन्तोष मेनेङ्बो, भक्तिप्रसाद सिटौला, महाधिवेशन प्रतिनिधि पर्शुराम ढुंगाना, मचिन्द्र शेर्मा, खड्गबहादुर कार्की लगायतले शुभकामना मन्तब्य राखेका थिए ।

पार्टीका नगर सभापति अशोक बस्नेतले आफ्नो कार्यकाल शुरु भएदेखि हालसम्म गरेका कार्यहरुको विवरण र आगामी योजना समेटिएका प्रतिबेदन प्रस्तुत गरेका थिए। सन्तकुमार फेवदिनले स्वागत गरेको कार्यक्रमको सन्चालन होम दुलालले गरेका थिए ।