सुनसरी।

सुनसरीको धरानको दुई छुट्टा छुट्टै स्थानहरुबाट २ थान पेस्तोलसहित तीन जनालाई प्रहरीले पक्राउ गरेको छ । पक्राउ पर्नेमा धरान उपमहानगरपालिका–१७ डाँडा घोपाका २९ बर्षीय हुकमेन जिमी, उनका भाई २४ बर्षीय दिपक जिमी र धरान–१५ का २४ बर्षीय रोहित राई रहेका छन् । 

बिशेष सुचनाको आधारमा बैशाख ३१ गते राती कोशी प्रदेश प्रहरी कार्यालय विराटनगरको (आरआइटी) समुह र इलाका प्रहरी कार्यालय धरानको प्रहरी टोलीले हुकमेन जिमी र दिपक जिमीलाई उनको घरकोठाबाट नियन्त्रणमा लिई सोधपुछको क्रममा हुकमेन जिमीले २ थान पेस्तोल खरिद गरी ल्याएकोमा १ थान दिपक जिमीलाई राख्न दिएको र १ थान रोहित राईलाई दिएको भनेर  बताए ।

उनका अनुसार घर पश्चिम रहेको सर्दुखोला नजिकको झाडीमा झोलामा लुकाई छिपाई राखेको नचल्ने अवस्थामा रहेको १ थान पेस्तोल प्रहरीले बरामद गरेको हो । त्यस्तै सोही राती रोहीत राईको घरकोठा खानतलासी गर्दा पलङको डस्ना मुनी लुकाई छिपाई राखेको अवस्थामा म्याग्जिन सहितकोMade in Italy  लेखेको १ थान पेस्तोलसहित राईलाई पक्राउ गरेको हो । दुई वोटा पेस्तोलसहित पक्राउ परेका तीनैजनाको इलाका प्रहरी कार्यालय धरानले थप अनुसान्धान गरिरहेको कोशी प्रदेश प्रहरीले जनाएको छ ।