बिर्तामोड । 

नेकपा एमाले तर्फका उम्मेद्वारहरुले बिर्तामोडमा बुधवार (आज) सम्पादकहरुसँग अन्तरक्रिया कार्यक्रम गरेका छन् । संयुक्त निर्वाचन परिचालन समिति झापा क्षेत्र नं. २ को आयोजनामा मंसिर ४ गते हुने प्रतिनिधिसभा तथा प्रदेशसभा सदस्य पदका उम्मेद्वारहरुसँग अन्तरक्रिया भएको हो । 

नेकपा एमाले झापा क्षेत्र नं. २ का प्रतिनिधिसभा सदस्य देबराज घिमिरे, प्रदेशसभा सदस्य (२) १ का उम्मेद्वार एकराज कार्की र प्रदेशसभा सदस्य (२) २ का  उम्मेद्वार चिन्तक पाठकले सम्पादकहरुसँग अन्तरक्रिया गरेका हुन् । 

नेकपा एमाले र राप्रपाले तालमेल गरी झापामा उम्मेदवारी दर्ता गरेपछि दुई दलको संयुक्त निर्वाचन परिचालन समिति बनेको छ ।  उम्मेद्वारहरुले सम्पादकका जिज्ञासाको जवाफ दिएका थिए । 

झापा क्षेत्र नं. २ का प्रतिनिधिसभा सदस्य पदका उम्मेद्वार घिमिरेलाई पत्रकारहरुले महाकाली सन्धी हस्ताक्षरका बिषयमा जिज्ञासा राखेका थिए । पत्रकारको जिज्ञासाको जवाफ दिदै घिमिरेले महाकाली सन्धी राष्ट्रको हितमा भएको बताए । उनले सन्धी गर्दाताका गरिएको सम्झौता पूर्ण कार्यान्वनमा नआएकाले समस्या सिर्जना भएको बताए । 

मनमोहन अधिकारी बिरामी भएका कारण पार्टीको पहिलो बरियताक्रममा रहेका बैकल्पिक केन्द्रीय सदस्यको हैसियतले घिमिरेले सन्धिको पक्षमा निर्णायक मत हालेका थिए । पछिल्लो समय एमाले अध्यक्ष केपी शर्मा ओलीले महाकाली सन्धि गल्ती भएको स्वीकार गरिसकेका छन् ।

२०५२ साल माघ २९ गते नेपाल र भारत सरकारका प्रतिनिधीले हस्ताक्षर गरेको पञ्चेश्वर परियोजनासहितको एकिकृत महाकाली सन्धि २०५३ साल असोज ३ गते संसदको दुवै सदनको संयुक्त बैठकले अनुमोदन गरेको थियो ।

प्रदेशसभा तर्फका उम्मेदवार कार्कीले एक कार्यकाल सांसद भएर पनि कतिपय प्रतिवद्धता पूरा नगरेको भन्ने पत्रकारको जिज्ञासाको जवाफ दिदै बजेटको परिधिमा रहेर काम गर्नुपर्ने भएकाले भनेजति काम गर्न नसकेको स्वीकारे । अर्का प्रदेशसभा सदस्य पदका उम्मेद्वार पाठकले पत्रकारको जिज्ञासाको जवाफ दिदै आफूलाई हारको पर्यायका रुपमा चित्रित गर्नु असान्दर्भिक नभएको बताए ।