बिर्तामोड  ।

प्रतिगमन विरुद्ध संगठित लोकतान्त्रिक–बाम गठबन्धनका झापा क्षेत्र नं–२ का उम्मेद्वार हरिकुमार रानाले देश र जनताको हित विपरित कहिल्यै काम नगरेको बताउँदै अब पनि जनताको शिर निहुरिने काम कहिल्यै नगर्ने प्रतिबद्धता जनाएका छन् ।

अर्जुनधारा नगरपालिका वडा नं–६ को आयोजनामा सम्पन्न वडा भेलालाई सम्बोधन गर्दै प्रमुख अतिथि रानाले आफूले एमाले त्यागेको तर अरु कुनै पार्टीमा प्रवेश नगरी साझा उम्मेद्वारका रुपमा उठेको बताउँदै यस्तो प्रतिबद्धता जनाएका हुन् । 

त्यसैगरी झापा क्षेत्र नं–२ प्रदेशसभा २ का उम्मेद्वार खगेन्द्र मैनालीले आफूलाई अग्रजहरुको आशिर्वाद र युवाहरुको साथ रहने विश्वास ब्यक्त गरे । झापा क्षेत्र नं–२ को विकास निर्माण र जनताका समस्याबारे समाधानमा आफू हरप्रहर क्रियाशिल रहने प्रतिबद्धता जनाए ।

कार्यक्रममा निर्वाचन परिचालन समितिका संयोजक सुधिरकुमार शिवाकोटीले मुलुकको आवश्यकताका आधारमा अग्रगामी शक्तिहरुबीच गठबन्धन भएको चर्चा गर्दै मुलुकबासीको हित र जनआन्दोलनको उपलब्धी रक्षाका लागि गठबन्धनका उम्मेद्वारलाई जिताउनु सबैको दायित्व भएको धारणा राखे ।

अर्जुनधारा नगरपालिका वडा नं–६ का सभापति नेत्र विमलीको सभापतित्वमा सम्पन्न कार्यक्रममा निर्वाचन परिचालन समिति क्षेत्र नं–२ का सचिव सिपी कडरिया, सदस्य तीर्थ सिग्देल लगायतले बोलको थिए ।