निर्वाचन आचारसंहिता पूर्ण पालना गर्न पत्रकार महासंघ झापाको आव्हान

बिर्तामोड ।

फागनु २१ गते हुने प्रतिनिधिसभा सदस्य निर्वाचनलाई आमसञ्चार माध्यम र पत्रकारहरूले आचारसंहिता र निर्वाचन आचारसंहिता पूर्णरुपमा पालना गर्न आव्हान गरेको छ ।

नेपाल पत्रकार महासंघ झापा शाखाले आज (मंगलबार) एक प्रेस विज्ञप्ति जारी गर्दै फागुन २१ गते अर्थात विहीबार हुने मतदान निर्वाचनलाई स्वतन्त्र, स्वच्छ, निष्पक्ष, शान्तिपूर्ण, सबैका लागि पहुँचयुक्त, भयरहीत र धाँधलीरहीत रुपमा सम्पन्न गर्न आग्रह गरेको हो ।

निर्वाचनका लागि सञ्चार क्षेत्रले अझ जिम्वेवार भूमिका निर्वाह गर्नेमा महासंघ झापा विश्वस्त छ र निर्वाचनको यस मौन अवधिमा सञ्चार क्षेत्रसहित सबै सारोकारवालालाई पुनः स्मरण गरागराउँदै आम सञ्चारमाध्यम र पत्रकारका लागि सात बुँदे आचारसंहिता सार्वजनिक गरेको सचिव राजु पाठकद्धारा हस्ताक्षरित बिज्ञप्तिमा उल्लेख छ ।

यस्ता छन् पत्रकार आचारसंहिता र निर्वाचन आचारसहिता

१) पत्रकार आचारसंहिता र निर्वाचन आचारसहिता पूर्णरुपमा पालना गरी व्यवसायिक पत्रकारिताको अभ्यासमा जिम्वेवार ढंगले प्रस्तुत हुन सबै आमसञ्चारमाध्यम र पत्रकारहरूलाई आग्रह गर्दछौं ।

२) निर्वाचन मौन अविधिको पालना बारे निगरानी र सरोकारवालाहरुलाई खबरदारी गर्नुपर्ने आवश्यकता उत्तिकै रहेको छ । अहिले समाज सामाजिक सञ्जाल र सञ्चारमाध्यममा आएका सामग्री कुन समाचार हो, कुन होइन भन्ने व्याप्त भ्रममा अल्झेको छ । यस्ता भ्रम मौन अवधिमा अझै बढी फैलाउने प्रयास हुनसक्छन् । समाजका यी भ्रमहरूलाई चिर्न सत्य तथ्य र निष्पक्षमा आधारित रहेर सामग्री प्रकाशन, प्रसारण गर्न सबै आमसञ्चारमाध्यम र पत्रकारहरूलाई आग्रह गर्दछौं ।

३) प्रेस ज्याकेट, परिचयपत्र भिरेर पत्रकारको पहिचान खुल्ने गरी रिपोर्टिङका लागि कार्यक्षेत्रमा खटिन सबै पत्रकारहरुलाई आग्रह गर्दछौं ।

४) पत्रकारहरुले रिपोर्टिङका लागि कार्यक्षेत्रमा आवतजावत गर्न मतदानका दिन प्रयोग गर्ने पास लिएका सवारी साधनमा पत्रकार बाहेक अरु कसैलाई पनि नचढा नचढाउन, प्रेस ज्याकेट र परिचयपत्र दुरुपयोग हुन नदिन सबै आमसञ्चारमाध्यम र पत्रकारहरूलाई आग्रह गर्दछौं ।

५) निर्वाचनको रिपोर्टिङमा खटेका पत्रकारहरूलाई समाचार खोज्न, लेख्न र प्रसारण गर्ने कार्यमा कुनै पनि किसिमका अवरोध नर्गन सबै सरोकारवाला पक्षसँग अनुरोध गर्दछौं ।

६) पत्रकार र सञ्चारमाध्यमका सवारी साधनलाई प्रेस पास वा सवारी साधन पासका आधारमा निर्वाध रूपमा आवाज–जावत गर्ने व्यवस्था मिलाउन सबै पक्षसंग आग्रह गर्दछौं ।

७) पत्रकारलाई सुरक्षित रहेर उच्च मनोवलका साथ कार्यस्थलमा जुट्न महासंघ झापा अनुरोध गर्दछ ।