झापा ।
अरिदमन गण चारआली व्यारेकले ‘अभ्यास मनसुन–५’ अन्तरगत झापाका चारवटा पालिकाका करिव एक हजार जनालाई विपद् सम्बन्धी जनचेतनासहित अभ्यास गराएको छ ।
विपद्बाट बढी प्रभावित हुँदै आएका दक्षिणी झापाको कचनकवल, हल्दिवारी, बाह्रदशी र झापा गाउँपालिकाका बासिन्दाहरुलाई लक्षित गरी स्थलगत रुपमै गणले विपद् सम्बन्धी अभ्यास गराएको हो ।
विपद्को समयमा स्थानीय स्तरमा प्राप्त हुने सामग्री र स्रोत साधनहरुको प्रयोग गर्ने तरिका, सर्पदंश तथा स्वास्थ्य सम्बन्धी जनचेतनासहित अभ्यास गराइएको अरिदमन गणका गणपति प्रमुख सेनानी प्राजु बस्न्यातले बताए ।
जेठ २३ गते कचनकवल गाउँपालिकाको वडा नं.५ पाठामारी, २५ गते हल्दिबारी गाउँपालिका २ स्थित हल्दिबारी नमुना माध्यमिक विद्यालय, २७ गते बाह्रदशी गाउँपालिका–३ स्थित राजगढ झापा सामुदायिक भवन र बुधवार जेठ २८ गते झापा गाउँपालिका वडा नं १ को झापा बजारमा सो कार्यक्रम गरिएको गणपति बस्न्यातले जानकारी दिए ।
स्थलगत तालिम अभ्यास दौरान गणका गणपतिसहित ३५ जना विपद् सम्बन्धी दक्ष जनशक्तिले अभ्यास गराएका थिए । अभ्यासबाट चार पालिकाका ९ सय जना स्थानीय बासिन्दा लाभान्वित भएको जनाइएको छ ।
_1642945611.jpg)
