काठमाडौं । 

विश्वव्यापी भूटानी संगठन जीबीओ नेपालको औपचारिक उद्घाटन कार्यक्रम आज काठमाडौंको अनामनगरमा भव्य रूपमा सम्पन्न भएको छ। यो ऐतिहासिक कार्यक्रम नेपालकी अध्यक्ष श्रीमती शिला उप्रेतीको नेतृत्वमा सम्पन्न भएको हो। नेपाल प्रतिनिधि सभाका उपसभामुख इन्दिरा राना मगरको प्रमुख आतिथ्यमा भएको थियो । 

जीबीओ नेपालको उद्घाटन समारोहमा विभिन्न विशिष्ठ व्यक्तित्वहरूको उपस्थिति रहेको थियो। कार्यक्रमलाई विशेष बनाउन नेपाली हास्य कलाकार तथा अभिनेता मनोज गजुरेल, नेपाली फिल्म उद्योगका अभिनेता तथा निर्माता सिमान्त उदास, अभिनेता अनुभव रेग्मी, बेलडाँगी भूटानी शरणार्थी शिविरका सचिव सञ्चा हाङ सुब्बा, पथरी भूटानी शरणार्थी शिविरका सचिव कर्णवीर राईलगायत जीबीओका अन्य सम्मानित सदस्यहरू उपस्थित रहेका थिए।

कार्यक्रमको उद्घाटन समारोहमा प्रमुख अतिथि माननीय इन्दिरा राना मगरले जीबीओ नेपालको औपचारिक घोषणा गर्दै शुभकामना व्यक्त गरिन्। उनले जीबीओ नेपालले शरणार्थी समुदायको हकहितका लागि महत्त्वपूर्ण भूमिका खेल्ने विश्वास व्यक्त गरिन्। साथै, उनले भूटानी नेपाली समुदायको पहिचान, अधिकार र समृद्धिको यात्रामा जीबीओ नेपाल जस्तो संस्थाले महत्त्वपूर्ण योगदान पुर्‍याउने बताइन्।

कार्यक्रमका क्रममा प्रमुख अतिथिहरूले भूटानी नेपाली समुदायको वर्तमान अवस्था, नेपाल र अन्तर्राष्ट्रिय स्तरमा उनीहरूको पहिचान, अधिकार र भविष्यबारे चर्चा गरे। हास्य कलाकार तथा अभिनेता मनोज गजुरेलले आफ्नो सम्बोधनमा नेपाली भाषा, संस्कृति र पहिचानको प्रवर्द्धनमा ध्यान दिनुपर्ने आवश्यकता औंल्याए।