शान्ति सामुदायिक वनको ट्रयाक्टरसहित काठ नियन्त्रण गरी कनकाई सबडिभिजनलाई जिम्मा

अर्जुनधारा ।

काठसहित झापाको एक सामुदायिक वनको ट्रयाक्टर नियन्त्रणमा लिइएको छ। अर्जुनधारा नगरपालिका वडा नम्बर २ स्थित शान्ति सामुदायिक वनको ट्रयाक्टरलाई युवाहरूको समूहले नियन्त्रणमा लिएर सम्बन्धित निकायको जिम्मा लगाएको हो।

सामुदायिक वनको जङ्गल क्षेत्र ब्लक नम्बर ३ र ४ अन्तर्गत रहेको ठूलो गुन्द्रुके खोल्सीमा सालको मुढा लोड गरेको अवस्थामा सामुदायिक वनकै मे १ त ६११ नम्बरको ट्रयाक्टरलाई राष्ट्रिय युवा संघ नेपाल अर्जुनधाराको टोलीले नियन्त्रणमा लिएर प्रहरी र कनकाई सबडिभिजन वन कार्यालय सुरुङ्गाको जिम्मा लगाएको हो।

कटान आदेश समेत नलिएको अवस्थामा रूख ढाली ढुवानी गरिरहेको भन्ने सूचनाको आधारमा उक्त ट्याक्टरलाई नियन्त्रणमा लिएर सम्बन्धित निकायको जिम्मा लगाइएको युवासघ नेपाल अर्जुनधाराका अध्यक्ष धिरज मोक्तानले जानकारी दिए । युवासंघका अध्यक्ष मोक्तान, उपाध्यक्ष सुशील भुजेल, सहसचिव युकेश फुयाल लगायत स्थानीय उपभोक्ताहरूले सामुदायिक वनको ट्रयाक्टर लाई नियन्त्रणमा लिएका थिए ।

युवाहरूसँगै स्थानीय उपभोक्ताहरुले समेत ढलेको रुख काट्ने बहानामा नलडेको रुखलाई समेत काटेर सामुदायिक वनले अवैधानिक ढंगले काठ ढुवानी गरेको बताएका छन् । उक्त स्थलबाट साल जातको ११ थान लकडी र सामुदायिक वनको ट्रयाक्टर नियन्त्रणमा लिएको हो।

यता घटनास्थलमा पुगेका सबडिभिजन वन कार्यालय कनकाई सुरुङ्गाका कर्मचारी गोपाल नेपालले आफूहरुले लिखित रुपमा अनुमति नदिएको स्वीकार गरेका छन् । उनले सामुदायिक वनले ढले–पढेका रुख निकासीका लागि यसअघि मौखिक रूपमा मात्रै आफूले जानकारी पाएको बताए। तर घटनास्थलमा अर्को रुख समेत लडाएर मुढा निकासा गरिएको बारेमा भने आफू अनविज्ञ रहेको बताएका छन्। नेपालले घटनाको सम्बन्धमा थप अनुसन्धान भइरहेको र रुख लडाएर काटिएको भएमा कानुनी प्रक्रिया अघि बढ्ने बताएका छन्।

सामुदायिक वनका अध्यक्ष खगेन्द्र कोइरालाले आफूहरुले अनुमतिको प्रक्रिया अपनाए पनि सामान्य त्रुटि भएको स्वीकार गरेका छन् । सामुदायिक वनका सचिव नरेन्द्र गौतमले रुख कटान तथा निकासीको आदेशलाई कानुनी रुपमा पुरा नगरी लकडी ढुवानी गर्नु गल्ती भएको स्वीकार गरेका छन्।

अर्जुनधारा २ का जनप्रतिनिधि प्रेम उपरकोटीले सामुदायिक वनले असंवैधानिक ढङ्गले मुढा निकासा गर्न खोजिएको देखिएको बताएका छन्। उनले सामुदायिक वनले काठ निकासी गर्नुभन्दा अघि सम्बन्धित वन कार्यालय, स्थानीय जनप्रतिनिधिलाई समेत जानकारी नगराएको देखिएको बताए । उक्त संबन्धमा सबडिभिजन वन कार्यालय र प्रहरीले अनुसन्धान अघि बढाएको छ।

हाम्रो बारेमा

हाम्रो समूह

सम्पर्क