धनकुटा ।

धनकुटाको साँगुरीगढी गाउँपालिका–९ स्थितबाट प्रहरीले गोली फायर गरी लागूऔषध गाँजा बोकेको ५ वटा मोटरसाईकलसहित ६ जनालाई पक्राउ गरेको छ ।

पुस २४ गते बिहान सवा ४ बजे लागूऔषध गाँजा बिक्रिवितरण तथा ओसार पसार भइरहेको भन्ने विशेष सुचनाको आधारमा इलाका प्रहरी कार्यालय भेडेटारबाट खटिएको प्रहरी टोलीले साँगुरीगढी–९ स्थित कच्ची सडक खण्डमा चेकजाँचको क्रममा एक साथ आउँदै गरेको ५ वटा मोटरसाईकल रोक्ने क्रममा मोटरसाईकलमा सवार रहेका व्यक्तिहरुले प्रहरी टोलीमाथि नै हातपात तथा ढुंगामुडा प्रहार गरेपछि प्रहरीले राईफलबाट एक राउण्ड हवाई फायर गरी ओसार पसारमा संलग्न रहेका ६ जनालाई उनिहरुले मोटरसाईकलमा बोकेको १२० किलोग्राम गाँजासहित ५ वटा मोटरसाईकल नियन्त्रणमा लिएको हो ।

पक्राउ पर्नेहरुमा धनकुटा सहिदभुमी गाँउपालिका–१ का ३४ बर्षीय नकुल राई, २१ बर्षीय ओम प्रकाश राई, साँगुरीगढी–८ का २८ बर्षीय मंगल कुमार राई, २९ बर्षीय बिसन राई, २६ बर्षीय थाम वहादुर राई, २१ बर्षीय सुमन राई रहेकाछन भने उनिहरुले प्रयोग गरेको को. ३८ प ३५२२, प्रदेश १–०२–०५३ प ९६६३, प्रदेश १–०२–०५३ प ८६१७, प्रदेश १–०२–०४३ प ९५९६ र को. १४ प ७७५० नम्वरको मोटरसाईकल रहेको छ । लागूऔषध गाँजा सहित पक्राउ परेका उनिहरुको जिल्ला प्रहरी कार्यालय धनकुटाबाट कानूनी कारवाही तथा थप अनुसन्धान भईरहेको प्रहरीले जनाएको छ ।