झापा ।  

झापाको कमल गाँउपालिका वडा नम्बर २ समयगढको एक घरमा आगलागी भएको छ । आज (आइतवार) बिहान ३ बजेको समयमा सोही स्थान बस्ने चन्द्र श्रेष्ठको बाँसको भाटाको टाटीबेरा, टिनको छाना भएको १ तले घरमा अचानक आगलागी भएको हो । 

आगलागी भएको भन्ने जानकारी बिहान ४ः१५ बजे प्रहरी चौकी तोपगाछीमा गराउन साथ तत्काल प्रहरीको टोली घटना स्थलमा पुगेको थियो । 

प्रहरी टोली, स्थानियबासी र कमल गाँउपालिकाको दमकलको सहयोगमा आगो ५ बजे पूर्ण रुपमा नियन्त्रणमा आएको प्रहरीले जनाएको छ । 

आगलागीबाट घर, घरमा भएको भाडा वर्तन, अन्नपात, लता कपडा पूर्ण रुपमा जलेर नष्ट हुँदा ३ लाख रुपैयाँ बराबरको क्षति भएको जनाइएको छ ।  सो घटना सम्बन्धमा थप अनुसन्धान कार्य  भइरहेको जिल्ला प्रहरी कार्यालय झापाले जनाएको छ ।