झापा । 

झापाको अर्जुनधारा नगरपालिका वडा नम्बर ६ दासपुलमा मोटरसाइकल रुखमा ठोक्किँदा चालकको मृत्यु भएको छ । अर्जुनधारा–६ स्थित शनिश्चरे–बिर्तामोड सडक खण्डमा आज (शुक्रवार) दिउँसो अन्दाजी ४ बजे शनिश्चरेबाट बिर्तामोडतर्फ तीब्र गतिमा आउँदै गरेको बा ४९ प २१५९ नं. को मोटरसाइकल आफै अनियन्त्रित भई सडकको बाँया साईडमा रुखमा ठोक्किएको थियो । 

दुर्घटनामा मोटरसाइकल चालक ताप्लेजुङ श्रीजंघा गाउँपालिका वडा नम्बर ६ बस्ने २६ वर्षीय सन्तोष लिम्बूको मृत्यु भएको हो । टाउकोमा र छातीमा चोट लागेर गम्भीर घाइते लिम्बूलाई उपचारको लागि बीएण्डसी अस्पताल पठाइएकोमा डाक्टरले चेकजाँच गर्दा उनको मृत्यु भइसकेको थियो ।

मोटरसाइकलमा पछाडि सवार सोही ठाउँ बस्ने २३ वर्षीय श्रीप्रसाद लिम्बू घाइते भएका छन् । उनको सोही अस्पतालमा उपचार भइरहेको छ । मोटरसाइकल प्रहरी चौकी शनिश्चरेमा राखिएको इलाका प्रहरी कार्यालय बिर्तामोडका डीएसपी प्रकाश विष्टले बताए । चालकले मादक पदार्थ सेवन गरेको बताइएको छ ।