फिदिम बजार आसपासका क्षेत्र उच्च जोखिममा

पाँचथर।

गत असोज १० गतेदेखि १२ गतेसम्मको अविरल वर्षाका कारण पाँचथरको फिदिम बजार आसपासको क्षेत्र जोखिमपूर्ण बनेको छ । जिल्लाका कतिपय स्थानमा पहिरो झरेपछि सदरमुकाम फिदिम आसपासका क्षेत्र जोखिमपूर्ण बनेका छन् । सदरमुकाम फिदिम बजार आसपासका बजार तथा बस्ती पहिराका कारण जोखिममा परेका हुन् ।

फिदिम आसपासका क्षेत्रमा पहिरो झर्नुका साथै जमिने भासिने, लच्किने भएपछि त्यहाँका निजी तथा सामुदायिक संरचना जोखिममा परेका छन् । यसअघि पहिराको ठूलो जोखिम नदेखिएका बजार नजिकका क्षेत्रमा पहिरो झरेपछि स्थानीयवासी त्रासमा छन् ।

बजार नजिकको सुन्तलीचोकमा सडक माथिबाट ठूलो पहिरो झरेको थियो । यो पहिरोले ठूलो क्षति नगरे पनि पहिरोमाथिको जमिन लच्किएको छ भने सडक केही तलको जमिन दबिएको स्थानीय बताउँछन् । फिदिम नगरपालिका–७, ८ र १३ लाई सदरमुकामसम्म जोड्ने फिदिम–रानीटार–लुङरुपा सडकमा पहिरो झरेर थुप्रिएको छ ।

सानाठूला ढुङ्गा घर अगाडि थुप्रिएका छन् । वर्षा कम भएकाले स्थानीयवासी घरमा फर्किन थालेका बताउँदै स्थानीय चन्द्रप्रसाद सारु मगरले वर्षा भइञ्जेल विस्थापित भएको बताए । जिल्लास्थित नेपाल पत्रकार महासङ्घको शाखाको भवन पनि पहिरोको जोखिममा परेको उनले जानकारी दिए ।

सो क्षेत्रमा १७ परिवारको बसोबास रहेका मध्ये नौ परिवार पहिरोको त्रासमा बस्नुपर्ने अवस्था रहेको उनले जानकारी दिए । फिदिम नगरपालिका–२ रमिते, फिदिम बजारको चौतारेडाँडा, गैरीबारी तथा साभ्राङ आसपासमा पनि सानोठूलो पहिरो झरेको छ । फिदिम–१ गैरीबारी, फालेलुङ गाउँपालिका–५ प्राङ्बुङलगायतका स्थान पहिरोको उच्च जोखिममा छन् ।

अविरल वर्षापछिको बाढीका कारण फस्के जमिन रहेको फिदिम आसपासका धेरै क्षेत्र जोखिममा परेको फिदिम–१ का वडाध्यक्ष गजाधर भट्टराईले जानकारी दिए । उनले यस वर्ष जनधनको क्षति भएको बताउँदै पाँच जनाको ज्यान गुमाएको र १५ घर विस्थापित भएको बताए । तीन सयभन्दा बढी घर तथा संरचनामा क्षति भएको उनको भनाई छ । फिदिम बजार आसपासको क्षेत्रका माटो कमजोर रहेको र जुनसुकै विपद्मा पनि जोखिम हुने गरेको वडाध्यक्ष भट्टराईले बताए।

फिदिममा जिल्ला प्रहरी कार्यालयदेखि गैरीबारी, शिवालय मन्दिर, माथिल्लो गाउँ, ट्राफिक कार्यालय र ओदिनसम्म यसप्रकारको माटो रहेको र वर्षात् तथा भूकम्पमा घर भत्किने, चर्किने गरेको वडाध्यक्ष भट्टराईले जानकारी दिए । बजार क्षेत्रका धेरै संरचना जोखिमपूर्ण भएपछि भविष्यमा सुरक्षित बसोबासका लागि पहिरो रोकथामका पूर्वाधार निर्माण तथा सुरक्षित स्थानमा आवास निर्माणमा सबैपक्षले जोड दिनुपर्ने उनले उल्लेख गरे ।

सदरमुकामका अधिकांश संरचना रहेको वडा नं १ मा अहिलेसम्म पनि क्षतिको यकीन विवरण सङ्कलन हुन नसकेको वडाध्यक्ष भट्टराईले जानकारी दिए। अहिले क्षतिको विवरण यकीन गर्नेसँगै राहत वितरणको प्रक्रिया पनि अघि बढाइरहेको उनले जानकारी दिए ।संकेत तस्वीर

हाम्रो बारेमा

हाम्रो समूह

सम्पर्क