मोरङ।

मोरङको रंगेली नगरपालिका–१ पोखरी टोलस्थित भित्री सडक खण्डमा ट्याक्टरको ठक्करबाट मोटरसाईकल चालकको मृत्यु भएको छ ।

आज (मंगलबार) दिउँसो साढे १२ बजे  कर्सियाबाट सखरदिनातर्फ जाँदै गरेको प्र १–०४–००१ त १००४ नम्वरको ट्याकटरले सोहि दिशातर्फ जाँदै गरेको को. ६ प ६५४६ नम्बरको मोटरसाईकललाई ठक्कर दिँदा मोटरसाईकल अनियन्त्रित भई पैदल यात्री धनपालथान गाउँपालिका–६ का ४५ बर्षीय सिटुरु ऋषिदेवलाइ समेत ठक्कर दिएको थियो ।

ठक्करबाट मोटरसाईकल चालक धनपालथान–१ का ४६ बर्षीय रामबहादुर माझी र मोटरसाईकल पछाडि सवार उनकी श्रीमती ३६ बर्षीया मंगली चौधरी समेत तीनै जना घाईते भएका थिए । घाइते उनीहरुलाई उपचारको लागि गोल्डेन अस्पताल बिराटनगर पठाएकोमा उपचारको क्रममा रामबहादुर माझीको मृत्यु भएको थियो ।

दुर्घटनामा संलग्न ट्याक्टर र चालक धनपालथान–४ का २० बर्षीय रबिन मण्डललाई इलाका प्रहरी कार्यालय रंगेलीले नियन्त्रणमा लिएर घटना सम्वन्धमा थप अनुसन्धान गरिरहेको प्रहरीले जनाएको छ ।