झापा  । 

भाईको  हत्याको गरेको आरोपमा झापामा दाजुलाई प्रहरीले पक्राउ गरेको छ । झापाको शिवसताक्षी–८ मा गएराति हत्या आरोपमा दाजु पक्राउ परेका हुन् । 

शिवसताक्षी–८ शितल चौकका ४२ वर्षीय रामप्रसाद सिटौलाको हत्या आरोपमा उनका दाजु नारायण सिटौलालाई पक्राउ गरिएको प्रहरीले जनाएको छ । 

घटनापछि अनुसन्धानका लागि मृतकका दाजु नारायणलाई नियन्त्रणमा लिइएको इलाका प्रहरी कार्यालय झिलझिलेले जनाएको हो ।  गएराति करिव ९ बजे घरको पछाडिपट्टि उतानो परेको अबस्थामा रामप्रसादको शव फेला परेको थियो । प्रहरी निरीक्षक सुशिल थापामगरका अनुसार मृतकको शवलाई पोस्टमार्टमको लागि दमक अस्पताल पठाइएको छ।

उनको टाउकोमा चोट देखिएको छ । दाउराले प्रहार गरी हत्या गरेको हुनसक्ने आशंका गरिएको छ । घटनास्थल वरिपरि दाउरा छरिएको र रगत लतपतिएको थियो ।

उनलाई सुतेकै ठाउँमा दाउराले हानेको हुनसक्ने बताइएको छ । दुवै दाजुभाइले मादक पदार्थ सेवन गरी झगडा गरेको र नारायणले भाइलाई दाउराको चिर्पटले हत्या गरेको हुनसक्ने आशंका छ ।