• प्रेमबहादुर जिम्बा 

सुरुङ्गा । 

झापाको कनकाई नगरपालिका वडा नम्बर ६ चम्पापुरमा रहेको श्री चम्पापुर माध्यमिक विद्यालयले हरितालिका तीजको अवसरमा विशेष सांस्कृतिक कार्यक्रम गरेको छ। आज (मंगलबार) सम्पन्न भएको कार्यक्रममा विद्यार्थीहरूले विविध सांस्कृतिक प्रस्तुतीकरण गर्दै तीज पर्वलाई उल्लासमय बनाएका थिए।


कार्यक्रममा विद्यार्थीहरूले तीजका परम्परागत गीतहरूमा नृत्य प्रस्तुत गरेका थिए भने विभिन्न नाटक, कविता पाठ, र गीति प्रस्तुतिहरू समेत गरेका थिए। विद्यालयका प्रधानाध्यापकले तीजको महत्त्वबारे प्रकाश पार्दै विद्यार्थीलगायत सबैलाई शुभकामना व्यक्त गरेका थिए।


कार्यक्रममा विद्यार्थी, अभिभावक र शिक्षकहरूको उल्लेखनीय सहभागिता रहेको थियो । जसले तीज पर्वको रौनकलाई अझै बढाएको थियो। कार्यक्रमको अन्त्यमा सहभागीहरूलाई विद्यालयको तर्फबाट धन्यवाद ज्ञापन गरिएको थियो।