झापा । 

झापाको अर्जुनधारा नगरपालिका वडा नम्बर ४ बाट एक थान भरुवा बन्दुकका साथमा चोरीका सामानसहित तीन जना पक्राउ परेका छन् । उनीहरुलाई गएराती १०ः ३० बजेको समयमा पक्राउ गरिएको हो । पक्राउ पर्नेमा अर्जुनधारा–४ का अन्दाजी १९ बर्षिय आदित्य लिम्बु, सोही स्थानका २२ बर्षिय छिरिङ तामाङ र २१ बर्षिय निखिल तामाङ रहेका छन् । 

आदित्यको साथबाट चाँदीको सिक्री–१ थान, नेपाल टेलीकमको रु.५० दरको रिचार्ज कार्ड १९ थानसहित फेला परेको, छिरिङको साथबाट चाँदीको औठी २ थान र पाउजु २ थान, सिक्री १ थान, एनसेल कम्पनीको रु.५० दरको रिचार्ज कार्ड ५ थान फेला परेको र निखिलको साथबाट चाँदीको सिक्री १ थान फेला परेको प्रहरीले जनाएको छ । त्यसैगरी चोरी गर्दा प्रयोग भएको खुकुरी एउटा किराना पसलबाट बरामद गरिएको प्रहरीले जनाएको छ । 

 उनीहरुले शुक्रवार राती १०ः१० बजेको समयमा अर्जुनधारा–७  मिलडाँडा बस्ने इन्दिरा अधिकारीले सञ्चालन गरेको किराना पसलमा ताला फुटाई नगदलगायत सरसामानहरु चोरी गरेको भन्दै शनिवार प्रहरी चौकी शनिश्चरेमा जानकारी प्राप्त भएको थियो । 

उक्त जानकारी प्राप्त हुना साथ प्रहरी चौकी शनिश्चरेबाट खटिएको प्रहरी टोलीले चोरी गर्ने व्यक्तिहरुको अनुसन्धान तथा खोजतलास शुरु गरेको थियो । 

खोजी गर्ने क्रममा गर्ने क्रममा शनिवार राती १०ः३० बजेको समयमा अर्जुनधारा–४ देवान चोक उनीहरुलाई शंकाष्पद अवस्थामा फेला पारी नियन्त्रणमा लिएको थियो । नियन्त्रण गरिएका उनीहरुको अनुसन्धान गर्ने क्रममा छिरिङ तामाङको घरमा लुकाई छिपाई राखिएको अवस्थामा १ थान भरुवा बन्दुक समेत फेला थियो । 

उनीहरुलाई बरामद गरिएका सामानसहित इलाका प्रहरी कार्यालय अनारमनी झापामा राखेर थप अनुसन्धान कार्य  भइरहेको जिल्ला प्रहरी कार्यालय झापाले जनाएको छ ।