बिर्तामोड । 

 बिर्तामोड नगरपालिकाले सुरु गरेको  ‘पारिको होइन बारीको खाउँ’ कार्यक्रम अन्तर्गत ६ वटा सामुदायिक तरकारी बिक्री केन्द्र सञ्चालनमा आएका छन् । 

आज (बिहिबार)  वडा नम्बर ३ स्थित बिर्ताबजार सामुदायिक तरकारी बिक्री केन्द्रको उद्घाटन गरेसंगै  ६ वटा तरकारी बिक्री केन्द्र सञ्चालनमा आएका हुन् । कार्यक्रम अन्तर्गत अब ४ वटा संकलन तथा बिक्री केन्द्र औपचारिकरुपमा सञ्चालनमा आउन बाँकी छ । 

उद्घाटन कार्यक्रममा बोल्दै नगर प्रमुख पवित्रा महतारा प्रसाईले बिर्तामोडलाई विषादीमुक्त नगरकोरुपमा अघि बढाउन सबैलाई आग्रह गरिन् । उनले राम्रो र अर्गानिक तरकारी उत्पादन गर्ने कृषकलाई नगरबाट पुरस्कृत गर्ने गरि कार्य अघि बढाईने बताइन् । 

यस्तै वडा नम्बर ३ का वडाध्यक्ष मदन बुढाथोकीले किसानले उत्पादन गरेको तरकारीको बजारीकरण महत्वपूर्ण रहेको र यसलाई कुनैपनि अवस्थामा रोकिन दिन नहुने बताए। उनले बिर्तामोड माछामा आत्मनिर्भर रहेको भन्दै अन्य कृषिजन्य वस्तुको स्थानीय उत्पादनमा जोड दिए । कार्यक्रममा आर्थिक विकास  समिति संयोजक संगिता शिवा, कृषि शाखा प्रमुख राजेन्द्र कडरियाले धारणा राखेका थिए । 

बिर्ताबजार सामुदायिक तरकारी बिक्री केन्द्र सञ्चालक समितिका अध्यक्ष हरिप्रसाद बाँस्कोटाको अध्यक्षतामा आयोजित कार्यक्रममा नेकपा एमाले बिर्तामोड नगर कमिटी अध्यक्ष सुवास भट्टराई, नगर कार्यपालिका सदस्य सिता ढुंगाना लगायत विभिन्न वडाका जनप्रतिनिधि, किसान तथा उभोक्ताको सहभागिता रहेको थियो ।