काँकरभिट्टा । 

झापाको मेचीनगर नगरपालिका वडा नम्बर ६ पुरानो मेचीपुलबाट लागूऔषधसहित आज (आइतवार) दुई जनालाई प्रहरीले पक्राउ गरेको छ । पक्राउ पर्नेमा मेचीनगर नगरपालिका वडा नं. ७  का २८ बर्षिय झकबहादुर खड्का र सोही स्थानका ३० बर्षिय खड्गबहादुर दर्जी रहेका छन् । 

लागू औषध नियन्त्रण ब्युरो काँकरभिट्टा र इलाका प्रहरी कार्यालय काँकरभिट्टा झापाबाट खटिएको संयुक्त प्रहरी टोलीले चेकजाँच गर्ने क्रममा भारतकोबाट नेपाल तर्फ आउँदै गरेका खड्कालाई शंका लागेर चेकजाँच गरेको थियो । 

खड्कामाथि शंका लागेर चेकजाँच गर्दा प्लाष्टिकले पोका पारेर बाँया हातको हत्केलामा मुठ्ठी पारी लुकाई राखेको प्रतिबन्धित लागू–औषध खैरो हेरोइन प्लाष्टिक बाहेक ५ ग्राम फेला परेकोले प्रहरीले नियन्त्रणमा लिएको थियो । 

उनलाई सोधपुछ गर्दा उक्त पदार्थ दर्जीले भारतबाट खरिद गरि काँकरभिट्टासम्म पुर्याई दिनु भनि दिई पठाएको भनि जानकारी प्राप्त भएको प्रहरीले जनाएको छ ।  उक्त जानकारी प्राप्तसँगै खोजतलास गर्ने क्रममा मे.२ प. ८५४१ नम्बरको मोटरसाईकलमा आउँदैं गरेका दर्जीलाई फेला पारी नियन्त्रणमा लिएको प्रहरीले जनाएको छ । 

उनीहरु दुवै जनालाई इलाका प्रहरी कार्यालय काँकरभिट्टामा राखेर थप अनुसन्धान कार्य भइरहेको जिल्ला प्रहरी कार्यालय झापाले जनाएको छ ।