झापा । 

झापाको बिर्तामोड नगरपालिका वडा नम्बर ७ खालबाडीमा दुई वटा जंगली हात्तीले भान्सा घरमा क्षति पुर्याएको छ । दुई वटा जंगली हात्तीले आज (शुक्रवार) राती बिहानको अन्दाजी २ बजेको समयमा घरमा क्षतिसँगै त्यहाँ भएको अन्नपात खाएको प्रहरीले जनाएको हो । 

दुई वटा जंगली हात्तीले बिर्तामोड–७ खालबाडीका टंकबहादुर जोगीको बासको टाँटी बेरा टिनको छानो भएको एक तल्ले कच्ची भान्सा घर  भत्काएको हो । 

जंगली हात्तीले भान्सा घर भत्काउनुका साथै जोगीको भान्छा भित्र रहेको अन्नपात धान, चामल, गहुँ, पिठो खा एक लाख रुपैयाँ बराबरको क्षति गरेका प्रहरीले जनाएको छ । 

घरमा क्षति गरेर हात्ती जंगलतर्फ गएको र अन्य मानविय तथा चौपायाको क्षति नभएको जिल्ला प्रहरी कार्यालय झापाले जनाएको छ ।