झापा ।  

झापाको मेचीनगर नगरपालिका वडा नम्बर ६ स्थित पुरानो मेचीपुलबाट लागूऔषधसहित स्कुटरका साथमा दुई जना पकाउ परेका छन् । भारतबाट नेपालतर्फ आउँदै गरेको को.२५ प. २४४५ नम्वरको स्कुटरमा प्रतिबन्धित लागू औषध खैरो हेरोइन फेला परेपछि उनीहरुलाई गएराती १० बजेको समयमा पक्राउ गरिएको हो । 

पक्राउ पर्नेमा विर्तामोड नगरपालिका–७ का ३३ बर्षिय सुरज लामा र स्कुटर पछाडी सवार बिर्तामोड–५ का २२ बर्षिय बिजय मगर छन् । लागूऔषध नियन्त्रण ब्युरो काँकरभिट्टा र इलाका प्रहरी कार्यालय काँकरभिट्टाबाट खटिएको संयुक्त प्रहरीले उनीहरुलाई नियन्त्रणमा लिएको थियो ।

उनीहरुमाथि शंखा लागेर चेकजाँच गर्दा स्कुटरको फुटरेसमा प्लाष्टिकमा पोको पारी लुकाई छिपाई ल्याउँदै गरेको खैरो हेरोइन प्लाष्टिक बाहेक ४ ग्राम फेला परेको थियो । उनीहरुलाई नियन्त्रणमा लिई इलाका प्रहरी कार्यालय काँकरभिट्टामा राखेर थप अनुसन्धान भइरहेको जिल्ला प्रहरी कार्यालय झापाले जनाएको छ ।