बिर्तामोड । 

गएराती झापाको बिर्तामोड नगरपालिका वडा नम्बर ७ बाह्रघरेमा जंगली हात्तीले तीन घरमा क्षति गरेको छ । बुधवार राती अन्दाजी १ बजेको समयमा गाउँ पसेको जंगली हात्तीले तीन घरमा क्षति पुर्याएको हो । 

जंगली हात्तीले बिर्तामोड–७ भवानी सुनुवार, सोही स्थानका राम पौडिया सतार र रसौदा खातुनको घरमा क्षति गरेको प्रहरीले जनाएको छ । 

सुनवारको पक्की घेराबारा, टिनको छानो भएको एक तले घरको पश्चिम उत्तर तर्फको पर्खाल भत्काउँदा १ लाख रुपैयाँ बराबरको क्षति भएको छ । त्यस्तै सतारको टांटी घेराबारा, टिनको छानो भएको एक तले घरको दक्षिण तर्फबाट टाटी भत्काउँदा ३० हजार र खातुनको टिनको गुम्टीको अगाडीको ढोका भत्काउँदा अन्दाजी २ हजार रुपैयाँ बराबरको क्षति भएको प्रहरीले जनाएको छ । 

जंगली हात्तीले तीन वटा घरमा क्षति गरेको खवर आज बिहान ७ः३० बजेको समयमा टेलिफोनमार्फत जानकारी अस्थायी प्रहरी चौकी गारामनी झापामा जानकारी भएपछि प्राप्त प्रहरीको टोली घटना स्थल गएर जानकारी लिएको जिल्ला प्रहरी कार्यालय झापाले जनाएको छ ।