- नेत्र बिक्रम बिमली
वनियानी ।
झापाको कचनकवल गाउँपालिकामा ४३०४ जनाले सामाजिक सुरक्षा भत्ता लिएका छन् भने अति विपन्न १५ सय परिवारलाई पालिकाको नीति तथा कार्यक्रम मार्फत छुट्टाएको रकमबाट स्वास्थ्य विमा गरिएको छ ।
गाउँपालिका अध्यक्ष कालेन्द्रप्रसाद सिंह राजवंशीका अनुसार उक्त संख्यामा सामाजिक सुरक्षा भत्ता विमा गरिएको हो । अध्यक्ष राजवंशीका अनुसार अघिल्लो आर्थिक बर्ष २०७९/०८० मा विमा गरिएका १ हजार परिवारले बिमा नवीकरण गर्दा २५ प्रतिशत रकम बुझाउनु पर्छ भने आर्थिक बर्ष २०८०/०८१ को बजेट मार्फत थप ५ सय परिवारलाई भने पालिकाले नै निःशुल्क बिमा गरिदिएको छ ।
त्यस्तै कचनकवल गाउँपालिका भित्रका गर्भवती महिलालाई समेत निःशुल्क बिमा गरिदै आएको अध्यक्ष राजवंशीले जानकरी दिएका छन् । गाउँ पालिकाले उपलब्ध गराएको चालू आर्थिक बर्ष २०८०/०८१ को चौथो त्रैमासिक सम्म सामाजिक सुरक्षा भत्ता पाउनेको संख्या ४ हजार ३ सय ४ पुगेको छ । नेपाल सरकारले प्रदान गर्ने ८ वटा कलस्टरका १७४१ पुरुष र २५७३ महिलाले सामाजिक सुरक्षा भत्ता प्राप्त गरेका छ्न् ।
कचनकवल गाउँपालिकाका ७ वटा वडाबाट पहिचान गरि पठाएका जेष्ठ नागरिक, जेष्ठ दलीत, एकल महिला, विधवा, पुर्ण अपांगता, अति अशक्त र अपांगता, दलित बालबालिका र लोपोन्मुख समुदायलाई नेपाल सरकारले तोके बमोजिमको सामाजिक सुरक्षा भत्ता पालिकाले प्रत्येक ३÷३ महिनामा बैक मार्फत उनिहरुकै खातामा हालिदिने गरेको अध्यक्ष राजवंशीले जानकारी दिए । कचनकवल गाउँपालिकाले उपलब्ध गराएको विवरण अनुसार १३६९ पुरुष र १३०४ महिला गरि २६७३ जना जेष्ठ नागरिकले मासिक ४ हजारकादरले जेष्ठ नागरिक भत्ता पाउने गरेका छ्न् ।
त्यसैगरी ६० देखि ६८ बर्ष उमेर समुहका जेष्ठ दलित २२ पुरुष र ९ महिला गरि ३१ जनाले मासिक २३६० जेष्ठ दलित भत्ता प्राप्त गर्ने गरेको पालिकाले उपलब्ध गराएको विवरणमा उल्लेख छ । त्यस्तै ३६३ जना एकल महिला र ६०० जना विधवा महिलालाई मासिक २६६० का दरले भत्ता उपलब्ध गराउदै आएको छ भने १०४ जना पुर्ण अपांगता भएका ५५ पुरुष र ५९ जना महिलाले समेत मासिक ३९९० का दरले अपांगता भत्ता प्राप्त गरिरहेका छ्न् । त्यसैगरी अति अशक्त अपांगता भएका २३७ पुरुष र १७९ जना महिला गरि ४१६ जनाले मासिक २१२८ रुपैयाँ भत्ता प्राप्त गरिरहेको विवरणमा उल्लेख छ ।
त्यस्तै दलित बालबालिका ३९ पुरुष र २६ महिला गरी ६५ जनाले मासिक ५३२ रुपैयाँका दरले भत्ता पाउने गरेका छ्न भने लोपोन्मुख जातिका १९ पुरुष र ३४ महिला गरि ५३ जनाले मासिक ३९९० रुपैयाँ का दरले सामाजिक सुरक्षा भत्ता लिने गरेको गाउँपालिकाले जनाएको छ । कचनकवल गाउँपालिकामा मात्र बार्षिक सामाजिक सुरक्षा भत्ता मार्फत ५ करोड ९५ लाख भन्दा बढी खर्च हुने गरेको पालिकाले उपलब्ध गराएको विवरणमा उल्लेख छ ।
_1642945611.jpg)
