हल्दिबारीको काजलीमा निर्माण सम्पन्न मन्दिर तथा धर्मशालाको उद्घाटन

हल्दिबारी ।

झापाको हल्दिबारी गाउँपालिका वडा नम्बर–२ र ४ को सिमानामास्थित काजली बजारमा निर्माण सम्पन्न भएको श्री श्री १००८ बाबा गणिनाथ मन्दिर तथा धर्मशालाको उद्घाटन भएको छ । पूर्व उपप्रधान तथा जलस्रोत उर्जामन्त्री तथा कार्यक्रममका प्रमुख अतिथि राजेन्द्र लिङ्देनले बिहीवार (आज) मन्दिर तथा धर्मशालाको उद्घाटन गरेका हुन् ।

श्री श्री १००८ बाबा गणिनाथ समावेशी सेवा समितिद्धारा निर्मित मन्दिर तथा धर्मशालाको एक कार्यक्रमकाबिच उद्घाटन भएको छ । श्री श्री १००८ बाबा गणिनाथ समावेशी सेवा समितिका अध्यक्ष नितेश शाहको अध्यक्षतामा भएको कार्यक्रममा स्वागत युवा समिति सदस्य खुसी शाहले गरेकी थिइन् ।

कार्यक्रममा प्रमुख अतिथि लिङ्देन, प्रदेश सभा सदस्य छबिलाल चुडाल, हल्दिबारी गाउँपालिकाका अध्यक्ष रबिन्द्रप्रसाद लिङ्देनलगायतले शुभकामना मन्तव्य राखेका थिए । सञ्चालन समितिका सचिब पंकज शाह र युवा समितिका अध्यक्ष राजकिशोर शाहले संयुक्त रुपमा गरेका थिए । सोही कार्यक्रमका बिच सांस्कृतिक नृत्य प्रदर्शन गरिएको थियो । सांस्कृतिक कार्यक्रममा आदर्श स्कुल अफ म्यानेजमेन्ट बिर्तामोडका बिद्यार्थीहरु र युवा समितिका सदस्यहरुले सहभागीता जनाएका थिए ।

७५ लाख १३ हजार ९६८ रुपैयाँको लागतमा निर्माण भएको मन्दिर तथा धर्मशालालाई हल्दिबारी गाउँपालिका, हल्दिबारी ३ र ४ नम्बर वडा कार्यालयबाट ६ लाख ८९ हजार ३१०, प्रदेश सरकारबाट २२ लाख ६९ हजार ११४ रुपैयाँ र स्थानीय दाताहरुबाट संकलित २५ लाख ३२ हजार ५०५ रुपैयाँ संकलन भएको समितिका अध्यक्ष शाहले जानकारी दिए । अध्यक्ष शाहका अनुसार २० लाख २३ हजार ३९ रुपैयाँ ऋण तथा सापटी मार्फत निर्माण सम्पन्न भएको हो ।

मन्दिरका लागि शिला पत्थरद्धारा निर्मित मूर्ति गणिनाथ खेमासती र गोबिन्दजीको भद्रपुरका स्व. रामचन्द्र गुप्ता र कौशल्यादेबी गुप्ताको स्मृतिमा उनका छोराहरुले प्रदान गरेका हुन् । रामसीताको मुर्ति भद्रपुर अन्जानीमोडका दीपक शाह, लक्ष्मणको मुर्ति हल्दिबारी–१ चक्लाका बैद्यनाथ शाह, हनुमानको मूर्ति नेपाल मधेशी समावेशी सेवा समिति बिर्ताबजार, गणेशको मूर्ति हल्दिबारी–२ का सच्चिन शाह, र राधाकृष्णको मूर्ति बिर्तामोडका राजकुमार गुप्ताले प्रदान गरेको जनाइएको छ ।

त्यस्तै मन्दिर निमाणार्थ डेढ कठ्ठा जग्गा संयुक्त रुपमा उदय, उमेश, रामु, शाहले आफ्ना मातापिताको स्मृतिमा निःशुल्क प्रदान गरेका अध्यक्ष शाहले जानकारी दिए ।

हल्दिबारीको काजली बजारमा २०७८ बैशाख १३ गते शिलान्यास भएर निर्माण शुरू भएको बाबा गणिनाथ मन्दिर उद्घाटनका अवसरमा समितिले धार्मिक तथा सांस्कृतिसहित बिभिन्न सामाजिक कार्य आयोजना गरिएको अध्यक्ष शाहले जानकारी दिए । भोली शुक्रबार रक्तदान, शनिवार गणिनाथ पूजनोत्सव हुने बताइएको छ ।

हाम्रो बारेमा

हाम्रो समूह

सम्पर्क