• प्रकाश उप्रेती 
  

मेचीनगर ।

 गोरु तस्करी गरेको आरोपमा सादा पोसाकमा खटिएका सशस्त्र प्रहरी निरीक्षकसहितको टोलीको कुटाइबाट चार जना सशस्त्र प्रहरी जवान घाइते भएका छन् । 

टोलीले कुटपिट गर्दा झापाको नकलवन्दामा ड्युटीमा खटिएका सशस्त्र प्रहरी हवल्दार पासाङ तामाङ, सशस्त्र प्रहरी जवान रामबहादुर कार्की, गणेश तामाङ र शान्तकुमार राई घाइते भएका हुन् ।

गोरु तस्करीमा मिलेमतोमा सशस्त्र प्रहरी बल नम्बर(१ बराह वाहिनीका डीआईजी अन्जनीकुमार पोखरेलले सादा पोसाकमा खटाएका सशस्त्र प्रहरी निरीक्षक नवलप्रभात राईसहितको टोलीले कुटपिट गरेका हुन् ।

गोरु तस्करीगर्दा सादा पोशाकका सशस्त्रले माग गरेबमोजिम ब्यापारीले नजराना नबुझाएपछि गोरु कटाउन नदिन डिआइजि पोख्रेलले आदेश गरेका थिए । नकलवन्दाको माता चोकमा ड्युटीमा रहेका सशस्त्रले गोरु छोडेपछि पासाङलाई मंगलबार राति ८ बजे (गोरु किन छाडेको रु भन्दै सादा पोसाकका प्रहरी निरीक्षक राईले कुटपिट गरेका थिए ।

  त्यसपछि पोस्टमा रहेका अन्य प्रहरीलाई पनि पोसाक लगाउन लगाएर मेची खोलामा चोबल्दै निर्घात कुटपिट गरेका थिए । सशस्त्र प्रहरीलाई कुटपिट गरेको थाहा पाएपछि कुटपिटमा संलग्न निरीक्षक राई, प्रहरी जवान राम सुन्दर तामाङ र जीवन बास्तोलालाई स्थानीयले सामान्य हातपात गरेका थिए ।  स्थानीयले सशस्त्रको गाडी तोडफोड पनि गरेका थिए ।