धनकुटा ।

धनकुटाको सहिदभूमि गाँउपालिका–४ हिले–छिन्ताङ कच्ची सडक खण्डबाट प्रतिबन्धित लागूऔषध गाँजा बोकेको पिकअप गाडीसहित चालकलाई प्रहरीले ‍पक्राउ गरेको छ ।

गत माघ २८ गते इलाका प्रहरी कार्यालय छिन्ताङको प्रहरी गस्ती टोलीले छिन्ताङबाट हिलेतर्फ जादै गरेको को. १ ज ३११८ नम्बरको पिकअप गाडीलाई चेकजाँचको क्रममा डाला भित्र ४ सय किलोग्राम (१५ बोरा) गाँजा बरामद गरेको थियो ।

  उक्त गाडी प्रहरीले  रोक्न खोज्दा नरोकी केही पर गाडी छाडी चालक फरार भएका थिए । गाडीबाट लागूऔषध गाँजा बरामद भएपछि फरार रहेका चालकको खोजतलास तथा अनुसन्धानको क्रममा फाल्गुन ३ गते सुनसरीको इटहरी–२ मा लुकिछिपी बसेको अवस्थामा चालक सहिदभूमी गाँउपालिका–४ का ३१ बर्षीय किरण राईलाई प्रहरीले पक्राउ गरेको हो ।

पक्राउ परेका राईलाई  धनकुटा जिल्ला अदालतबाट म्याद थप गरी घटना सम्बन्धमा थप अनुसन्धान भईरहेको जिल्ला प्रहरी कार्यालय धनकुटाले जनाएको छ ।