आजदेखि माईवेनी मेला शुरु

सुरुङ्गा ।

आजदेखि परम्परागत रुपमा लाग्दै आइरहेको माइवेनी मेला शुरु भएको छ । कनकाई माईको दुवै किनारामा लाग्दै आएको माइवेनी मेला यसबर्ष पनि सधाझै पवित्र कनकाई माईको पुर्वी तटमा दिउँसो १ बजेदेखि शुरु हुने मेला आयोजक समितिका अध्यक्ष श्याम राईले बताएका छन् । कोरोना भाइरसका कारण बिगत दुई बर्ष अघिदेखि लाग्न नसकेको झापाको कनकाई माई मेला यसपटक आजदेखि लाग्ने मेला आयोजक समितिले जनाएको छ ।

प्रत्येक वर्ष माघे सङ्क्रान्तिको अवसरमा शिवसताक्षी नगरपालिका र कनकाई नगरपालिकाको बीच भएर बग्ने माईखोलाको दुबै पट्टी लाग्दै आएको माई मेला यसपटक पनि भब्य रूपमा लाग्ने भएको हो ।

कोरोनाभन्दा अघि सहज अवस्थामा वर्षेनी माईमेलामा तीन लाखभन्दा बढी भक्तजन तथा दर्शकहरु आउने गरेका थिए । माई मेलामा आएर मकर नुहाई पूजा, आरधना गरेमा मनोकांक्षा पुरा हुने धार्मिक विश्वास रहेको छ । कनकाई नदीलाई भगवती माईदेवीका रुपमा मान्ने गरिएको छ । भगवती माईदेवीमा स्नान गरेपछि मनोकांक्षा पुरा हुने विश्वास रहेको छ ।

नेपाल लगायत छिमेकी मुलुक भारतबाट समेत मकर स्नानका लागि आउनेहरुको संख्या उल्लेख्य हुने गरेको छ । झापा, मोरङ, सुनसरी, धनकुटा, इलाम, पाँचथर, ताप्लेजुङ्ग लगायत भारतको सिलिगुडी, सिक्किम, दार्जिलिङ्ग, असाम, मणिपुर लगायत भुटानबाट समेत मेलामा भक्तजन आउने गरेका छन् ।

कनकाई माई इलामका प्रमुख चार नदी जोगमाई नदी, माई नदी, पुवामाई नदी र देउमाई नदी मिसिएर बनेको छ । यो नदी महाभारत पर्वत श्रृङ्खलाबाट उत्पत्ति भई झापा जिल्लाको दोमुखा क्षेत्रबाट बगेको छ ।

पूर्वको पवित्र धार्मीक तथा पर्यटकिय क्षेत्रको रुपमा चर्चित कनकाई माईमा प्रत्येक बर्ष माघे सङ्क्रान्तिको अवसरमा लाखौं भक्तजनहरुले पुजा गर्न र मेला भर्न आउने गर्दछन् । त्यसलाई निरन्तरर्ता दिन आयोजकले यसपालि पुस २९ गते भोलिदेखि माघ २ गतेसम्म मेलाको आयोजना गरेको जनाएको छ ।

माईमेलामा विविधजात—जातिका संकृति अनुसारका सांस्कृतिक कार्यक्रमहरु आयोजना हुने गरेका छन् । यस अघिको माई मेला कोभिड–१९ को महामारीका कारण प्रभावित भएको थियो । कोरोना नियन्त्रण भएपछि भने यो वर्ष माईमेलामा तीर्थयात्रीको भिड उल्लेख्य लाग्ने अनुमान आयोजकले गरेको छ ।

यो वर्षपनि माई मेलामा रोटेपिङ, विभिन्न खेल तमासा, ब्रेकडान्स, बटर फ्लाई, कोलम्बस, विभिन्न जातजातीका झाँकी, कला साहित्यका विविधि कार्यक्रम आयोजना हुने कनकाई माई मेला मुल आयोजक समितिका शंकर भट्टराईले बताए । मेला भर्न आउने भक्तजनको सुविधालाई ध्यानमा राखेर सुरक्षा लगायातका सबै व्यावस्थापन मिलाइसकिएको कनकाई नगरपालिका ४ का वडाअध्यक्ष रोषन सुवेदीले बताए ।

हाम्रो बारेमा

हाम्रो समूह

सम्पर्क