झापा । 

झापाको कमल गाउँपालिकामा भएको सवारी दुर्घटनामा एक जनाको मृत्यु भएको छ । दुर्घटनामा मोटरसाइकल चालक मोरङ मिक्लाजुङ गापा–७ का ३८ वर्षीय नरेन्द्र सेलिङको मृत्यु भएको जिल्ला प्रहरी कार्यालय झापाले जनाएको हो ।

कमल–५ लव डाँडास्थित राजमार्गमा पूर्वबाट पश्चिमतर्फ आउदै गरेको प्र१–०१–०१६ प २०९४ नं. को स्कुटी, विपरित दिशाबाट जाँदै गरेको मे २ प २१५७ नं को मोटरसाइकल र पश्चिमबाट पूर्वतर्फ नै जाँदै गरेको प्र १–०१–०१५ प ७४८७ नं. को स्कुटी एक आपसमा ठोक्किएर दुर्घटना भएको थियो ।

दुर्घटनामा मे २ प २१५७ नं. को मोटरसाइकलमा सवार सेलिङलाई उपचारका लागि लाइफलाइन अस्पताल दमक पठाइएकोमा बाटोमै मृत्यु भएको थियो । सोही मोटरसाइकलमा पछाडि सवार शिवसताक्षी–९ का २४ वर्षीय मनोज लिम्बू तल्लो ओठमा सामान्य चोट लागेको छ । उनको लाइफलाइन अस्पताल दमकमा उपचार भइरहेको छ ।

दुवै स्कुटी चालक इलाम चुलाचुली–१ का ३५ वर्षीय सन्तोष लिम्बु, ओखलढुङ्गा सिद्धीचरण–२ का २४ वर्षीय तेजराज कटवाल र तिनै वटा सवारी साधन इलाका प्रहरी कार्यालय दमकको नियन्त्रणमा रहेको जिल्ला प्रहरी कार्यालय झापाले जनाएको छ ।