लक्ष्मीपुर । 

झापाको कनकाई नगरपालिका –६ चम्फापुरमा आयोजना भएको महायज्ञको आय–व्यय सार्जजनिक भएको छ । सडक बाल–बालिका संरक्षण तथा गुरुकुल शिक्षा प्रदान गर्ने उदेश्यका साथ राधिका फाउन्डेशनले आयोजना गरेको सप्ताह श्रीमद् भागवत  धनधान्याचल  महायज्ञको हिसाव सार्वजनिक भएको हो । 

राधिका फाउण्डेशनकी अध्यक्ष तथा महायज्ञ की प्रमुख कथा वाचिका राधिका दासीले बिहीवार(आज) महायज्ञ स्थलमा पत्रकार भेटघाट गरी आय–ब्यय सार्वजनिक गरेकी हुन् । 

उनले सार्वजनिक गरेको आय–ब्यय अनुसार गत मंसिर २२ देखि २८ गतेसम्म आयोजना भएको महायज्ञबाट ४० लाख ५० हजार ७९७ रुपैयाँ संकलन भएको र खर्च १७ लाख ४ हजार २२५ रुपैयाँ भएर २३ लाख ४६ हजार ५७२ रुपैयाँ बचत भएको छ । त्यस्तै बिभिन्न दाताहरुबाट १३ कठ्ठा १० धुर जग्गा प्राप्त भएको दासीले जानकारी दिइन् । उनले झापाका स्थानीय सरकारले पनि बाल हेल्फ लाइन सेन्टर बनाउन सहयोग गर्ने आश्वसन दिएको बताएकी छिन् । दासीले प्राप्त जग्गामा किताकाँट खुल्ने बित्तिकै नापजाँच गरेर भवन निर्माणको कार्यलाई अगाडी बढाउने बताएकी छिन् । 

सडक बाल–बालिका संरक्षण तथा गुरुकुल शिक्षा प्रदान साथै असहाय, सहाराबिहिन, बिपन्न वर्गहरुको सहाराका लागि  दाता तिम्सिना परिवारबाट प्राप्त जग्गामा भवन निर्माण साथै संस्थालाई दीगो रुपमा सञ्चालन गर्दै पूर्वीय वैदिक सभ्यता र संस्कृतिको अध्ययन–अनुसन्धान गर्ने स्थलको रुपमा विकसित गर्ने लक्ष्य पुरा गर्न, विश्वशान्तिको कामना, राजनैतिक स्थायित्व र महामारी प्रशमनार्थका लागि महायज्ञको आयोजना गरेको फाउन्डेशनकी अध्यक्ष दासीले बताइन् । 

झापाको बाह्दशी–७ मा दाता पन्डित भिमप्रसाद तिम्सिना र अम्बिकाप्रसाद तिम्सिनाको परिवारले  निःशुल्क प्रदान गरेको जग्गामा भवन निर्माण गर्ने लक्ष्यका साथ महायज्ञको आयोजना गरिएको थियो । पत्रकार भेटघाटमा कनकाई वडा नं. ७ का वडाअध्यक्ष भिष्मभूषण सिटौला, समाजसेबी शेरबहादुर थापालगायतको उपस्थिति रहेको थियो ।