मेचीनगर ।

झापाको मेचीनगरबाट प्रकाशित लोकतन्त्र पोस्टले एक सय पृष्ठको रंगिन विशेषांक (लोकतन्त्र मेगेजिन) प्रकाशित गरेको छ ।

लोकतान्त्रिक गणतन्त्र स्थापनाका लागि १४ वर्ष जेल जीवन बिताएका सानो दुर्गा अधिकारी र २०६२/०६३ को जनान्दोलनमा सेनाको गोली लागेर घाइते भएका गोपाल श्रेष्ठसहित मेचीनगरका १२ जना पत्रकारहरुले सोमवार संक्षिप्त कार्यक्रमबीच संयुक्त रुपमा लोकतन्त्र मेगेजिनको लोकार्पण गरेका छन् ।

लोकार्पण गर्ने पत्रकारहरुमा ज्ञानेन्द्र निरौला, डम्बर बराल, पवन पौडेल, झुलन रेग्मी, जीआर धिताल, शिशिर चम्लागाई, प्रकाश पौडेल, गगन ढकाल, युवराज आचार्य लगायत रहेका छन् ।

लोकतन्त्र पोस्ट दैनिकले बिगत आठ वर्षदेखि वार्षिक रुपमा रंगिन मेगेजिन प्रकाशित गर्दै आएको छ । हरेक वर्ष दसैंमा प्रकाशित हुँदै आएको मेगेजिन यसपाली तिहारमा प्रकाशित भएको पत्रिकाका सम्पादक तथा प्रकाशक मोहन काजीले बताए । एक सय पृष्ठ रहेको यसपालीको मेगेजिनको कभर थिम ‘व्यवस्था फेरियो, अवस्था उस्तै’ भन्ने रहेको छ ।

मेगेजिनभित्र राष्ट्रगानका रचयिता व्याकुल माइला, चराखोजकर्ता देबेन्द्र खरेल, प्रखर युवा उद्यमी आशिष शर्मा, सप्तकोशी विकास बैंकका कामु सीइओ दिनेश पोखरेल, अभियन्ता अर्जुनकुमार कार्की, क्यान्सर रोग विशेषज्ञ डा. वीरेन्द्र यादव र नेत्ररोग विशेषज्ञ डा. जेनु शैजुको विशेष र रोचक अन्तरवार्ता प्रकाशित छ ।