झापा । 

झापा दमकका पत्रकार भूमिराज पराजुलीलाई नेपाल पत्रकार महासंघ झापा शाखाले निलम्बनको सिफारिस गरेको छ । दमक १० (५) घर भएका  पत्रकार पराजुलीलाई निलम्बनका लागि नेपाल पत्रकार महासंघ १ नम्वर प्रदेश समितिलाई सिफारिस गर्ने निर्णय गरेको हो । महासंघ झापाको आइतवार (आज) बसेको बैठकले यस्तो निर्णय गरेको महासंघ झापाका सचिव डिकेश लामाले जानकारी दिएका छन् ।

नेपाल पत्रकार महासंघ झापा शाखाका सदस्य समेत रहेका पराजुली उपर वैदेशिक राजगार विभागमा दर्ता भएको ठगी सम्बन्धि मुद्धाका सन्र्दभमा विभागले जिल्ला प्रहरी कार्यालय झापालाई कसुरदार पक्राउ गरी उपस्थित गराई दिने भनी पत्राचार गरेसँगै पराजुलीले झापासहित विभिन्न जिल्लाका सर्बसाधारणलाई ठगी गर्दै आएको खुलेको थियो । योसँगै झापा शाखाको बैठकले पराजुलीका सम्वन्धमा विभिन्न सञ्चार माध्यममा सार्वजनिक भएको समाचारका विषयमा समेत ध्यानाकर्षण भएको जनाएको छ । पत्रकार पराजुलीलाई यस अघि उनी आवद्ध हिमशिखर टेलिभिजनले समाचार संयोजक पदसहित संस्थाबाट बर्खास्त गरेको थियो ।

फैजदारी सम्बन्धि मुद्धाको कसुरदारको रुपमा रहेका पत्रकार पराजुली माथि लागेको कसुर उपर अनुसन्धानमा सहयोग गर्ने उद्धेश्यले उक्त मुद्धा फैसला नहुन्जेल र सफाई नपाएसम्मका लागि पत्रकार पराजुलीलाई महासंघको सदस्यताबाट निलम्बनका लागि पत्रकार महासंघ प्रदेश–१ समिति समक्ष सिफारिस गर्ने सर्वसम्मत निर्णय गरिएको महासंघ झापाले जारी गरेको विज्ञप्तिमा उल्लेख छ ।

वैदेशिक रोजगार विभागमा गत असार २० गते पराजुलीविरुद्ध उजुरी परेको र उजुरीका आधारमा विभागले जिल्ला प्रहरी कार्यालय झापालाई पत्राचार गरेको थियो  । विभागका अनुसन्धान अधिकृत कृष्णकुमारी भण्डारीद्वारा हस्ताक्षरित पत्रमा दमक–१० (५) बस्ने ३२ वर्षीय पराजुलीलाई पक्राउ पुर्जी जारी गर्दै निजको मेडिकल गराई विभागमा उपस्थित गराई दिन भनिएको थियो ।

पत्रकार पराजुलीले युरोप मुलुक रोमानिया पठाउने भन्दै झापाको दमक, पाँडाजुगी, बिर्तामोड, भद्रपुर, इलाम र मोरङको बेलवारीका १४ जनाभन्दा बढीबाट जनही ३ लाख रुपैयाँसम्म ठगी गरेको पीडितहरुले बताएका छन् । पत्रकार पराजुलीले रोमानिया पठाउने भन्दै धेरैलाई घरमै बोलाएर इन्टरभ्यू समेत लिने गरेको र  इन्टरभ्यूपछि रोमानियाको भिषा पक्का भयो भन्दै रकम लिने गरेको आरोप लागेको थियो ।

त्यसैगरी महासंघ झापा शाखाका सदस्य दमक निवासी पत्रकार उत्तम रिजाललाई समेत महासंघ झापा शाखाले निलम्वनको सिफारिस गरेको छ ।  इलाका प्रहरी कार्यालय इटहरी सुनसरीमा दर्ता भएको संगठित अपराध तथा विस्फोटक पदार्थ सम्बन्धि कसुरका सन्र्दभमा पत्रकार रिजाल माथि लागेको कसुर उपर अनुसन्धानमा सहयोग गर्ने उद्धेश्यले उक्त मुद्धा फैसला नहुन्जेल र सफाई नपाएसम्मका लागि पत्रकार रिजाललाई महासंघको सदस्यताबाट निलम्बनका लागि पत्रकार महासंघ प्रदेश–१ समिति समक्ष सिफारीस गर्ने सर्वसम्मत निर्णय गरिएको  महासंघद्वारा जारी विज्ञप्तिमा उल्लेख छ । 

यता पत्रकार पराजुलीमाथि भइरहेको चौतर्फी आक्रमण रोक्न प्रेस चौतारीले बिज्ञप्ती जारी गर्दै चेतावनी दिएको छ । पत्रकारहरुको पेशागत सुरक्षाका लागि स्थापना भएको छाता संस्था भएर पनि नेपाल पत्रकार महासंघ झापाले पत्रकारलाई अप्ठ्यारो हुँदा आवश्यक सहयोग गनुपर्नेमा राजनीतिक पूर्वाग्रह राखेर निलम्बनका लागि गरेको सिफारिस तत्काल फिर्ता लिन विज्ञप्ति मार्फत आग्रह गरिएको छ । विज्ञप्तीमा भनिएको छ, ‘निलम्बनका लागि गरेको सिफारिस फिर्ता नलिए पत्रकार महासंघ झापा विरुद्ध प्रेस चौतारी झापा सशक्त आन्दोलनका कार्यक्रम अघि सार्न बाध्य हुने अवगत समेत गराउँदछौं ।’