झापा । 

झापाको अर्जुनधारा नगरपालिका–४ सहासी टोल स्थित कच्ची सडक खण्डको ह्युम पाईप भित्र बोरामा फेला परेको शवको पहिचान भएपछि हत्यामा संलग्न तीन जनालाई प्रहरीले पक्राउ गरेको छ ।

जिल्ला प्रहरी कार्यालय झापाले (आज)आइतवार बिर्तामोडमा पत्रकार सम्मेलनको आयोजना गर्दै हत्यारा सार्वजनिक गरेको हो ।  पक्राउ पर्नेमा झापा अर्जुनधारा–७ कि ३२ बर्षीया जानुका सुबेदी थापा, उनका ४९ बर्षीय श्रीमान बिर्खबहादुर थापा र सुनसरी बराहक्षेत्र–१० का २५ बर्षीय सुरेश परियार रहेका छन् ।

असार १२ गते ह्युम पाईप भित्र सेतो बोरामा अन्दाजी ४० बर्षीय पुरुष मानिसको शव दुर्गन्धित अबस्थामा फेला परेपछि घटना स्थलमा खटिएको प्रहरी टोलीले मृतकको साथमा फेला परेको भारतीय आधार कार्डको  आधारमा ‍भारत अहमदाबाद गुजरातका ४० बर्षीय जपडिया नरेशकुमार बाबु भाई रहेको भन्ने खुल्न आएको थियो । 

हत्यामा संलग्न रहेका तीनै जनालाई हिजो इलाका प्रहरी कार्यालय अनामनीले  पक्राउ गरेको हो । पक्राउ परेका तीनै जनाको थप अनुसन्धान भईरहेको जिल्ला  प्रहरी कार्यालय झापाले जनाएको छ ।