• धर्मेन्द्र मामा 
  

बिर्तामोड । 

झापाको मेचीनगर नगरपालिका वडा नम्बर १४ निबासी लखी मर्डीको  घरमा गत शुक्रबार आगलागी हुँदा भएको जायजेथा सम्पूर्ण जलेर नष्ट भएको छ। चिया बगानमा मजदुरको रुपमा काम गर्ने मर्डी त्यसदिन पनि काममा व्यस्त थिइन् । यता घरमा कोही पनि नभएको बेला अचानक आगलागी भएर घर ध्वस्त भएपछि मात्र उनले खबर पाईन्। 

सुकुम्बासी बस्तीमा घर बाक्लै भएपनि आगलागी भएको बेला सबै मजदुरी काम गर्न गएका र आगलागी नियन्त्रण गर्न नसकिएको छिमेकीहरुले बताए। केही कारणले आगलागी भयो भन्ने कुनै यकिन हुन नसके पनि  विद्युत सर्ट भई आगलागी भएको अनुमान गरिएको छ।

आफूले काम गर्न जाँदा लगाएको लुगा बाहेक सबै लुगाफाटाहरु र खाधन्न जलेर नष्ट भएपछि अहिले उनी विचल्लीमा परेकी छन्। पन्ध्र बर्ष अघिदेखि नै श्रीमानले छोडेपछि दुई छोरा र छोरीका साथ गुजारा गर्दै आएकी मर्डी अब के गर्ने कसरी घर बनाउने भन्ने चिन्ताले पिरोले भएको बताइन्।

लामो समयदेखि आँखाको समस्याले ग्रस्त आफ्नो छोराको अप्रेसन गर्ने उद्देश्यले जम्मा गरेर राखेको नगद ६० हजार पनि जलेर खरानी भएपछि उनी थप पीडित बनेकी छन्।

दिनभरी मजदुरी गरेर बिहान बेलुकाको छाक टार्दै आएकी आफ्नी दिदीको घर जलेपछि अब कसरी सहयोग गर्ने भन्ने चिन्तामा छन् उनका दाजु भुपेश मर्फी। दिन दशा पनि गरिबलाई नै लाग्ने रहेछ दुखित हुँदै भुपेशले भने, सबै मनकारीहरुले यस दुःखमा साथ दिए फेरी दिदीको एउटा सानो झुपडी बनाउन सकिन्थ्यो कि भन्ने उनको झिनो आशा छ।

जाडोको समयमा आफ्ना लुगाफाटो सबै जलेपछि अहिले  नेपाल रेडक्रस सोसाइटीले दिएको एउटा त्रिपाल मुनि रात कटाइरहेका छन्। स्थानीय एक सहकारीले केही खाद्यान्न उपलब्ध गराएको छ भने गाउँलेहरुले सानोतिनो सहयोग जुटाईदिएका छन्।  बिचल्लीमा परेको मर्डी परिवारलाई सहयोग गरिदिनुहुन दाजु भुपेशले सबैमा आग्रह गरेका छन्।