बिर्तामोड कृषिथोकमा समितिले व्यवसायीको हकहितमा काम नगरेको आरोप (भिडियोसहित)

उद्धव पुरी

बिर्तामोड ।

झापाको बिर्तामोड–५ स्थित कृषि बजार ब्यवस्थापन समितिले व्यवसायीको हकहितमा काम गर्न नसकेकोको व्यापारीले आरोप लगाएका छन् । समितिले व्यवसायीको हकहित भन्दा बाहिर गएर काम गरिरहेको कृषिजन्य बस्तुको व्यापार गर्दै आएका व्यवसायीले आरोप लगाएका हुन् ।

व्यवस्थापन समितिले सिन्डीकेट लगाएर आफुखुसीका व्यापारीलाई सटर तथा गोदाम घर बेच्ने गरेको उनीहरुको भनाई छ । केही बर्षअघि कृषिजन्य बस्तु बेचविखनका लागि समितिले निर्माण गरेको कृषि चौतारीमा समेत सामानहरु राखेर बेच्न नपाएको थोक बिक्रेताले जनाएका छन् ।

बजारभित्र खुद्रा काउन्टर भएपनि होलसेल ब्यापार गर्न त्यहाँ असहज भएको र बाहिर समितिले निर्माण गरेको चौतारी तथा खुल्ला स्थानमा पनि ब्यापार गर्न समितिले रोक लगाएको तरकारी ब्यवसायी बिर्तामोड–५ का सोमबिक्रम बोहोराले बताए । ‘म ४ बर्षदेखि होलसेल व्यापार गर्दै आएको छु्’ बोहोराले भने ‘तर मैले व्यापार गर्न ठाउँ पाएको छुइन ।’ भारतीय तरकारी सामाग्री बिक्री वितरणका लागि समितिले ठाउँ दिएको बताउँदै उनले भने ‘हामी स्थानीयस्तरमा उत्पादन भएका सागशब्जी कोपी, टमाटर, साग, आलु, बन्दालगायतका कृषिजन्य सामाग्री बिक्री गरिरहेका छौं, तर, हामीलाई ठाउँ दिएको छैन ।’ भारतीय तरकारीलाई ठाउँ दिएको आफुहरुले इलाम, पाँचथर, ताप्लेजुङसहित झापाका बिभिन्न स्थानबाट ल्याएको तरकारीहरु बेच्न स्थान नदिने गरेको उनको भनाई छ ।

अर्का होलसेल ब्यापारी मदन अधिकारीले निरन्तर रुपमा व्यवसाय गरिरहेका ब्यापारीलाई ब्यापार अनुसारको बिक्री बितरणका लागि ठाउँ उपलब्ध गराउनु पर्ने माग गरेका छन् । कृषिथोकमा अहिले खुल्ला रहेको जमिनमा पहाडबाट ल्याइएको तरकारी बिक्री वितरण गर्न पाउनु पर्ने उनको माग छ ।

बर्षौदेखि तरकारी व्यवसाय गर्दै आएका २५ देखि ३० जना व्यापारीलाई स्थान समितिले उपलब्ध नगराएको आरोप लगाउँदै कृषिथोक बजारमा अन्य व्यवसाय जस्तै ग्यास, प्लाष्टिक, किराना पसललगायत सञ्चालन गरेकोप्रति आपत्ति जनाएका छन् ।

‘जुन व्यवसायका लागि कृषिथोकको स्थापना भएको छ’ व्यवसायी खगराज कट्टेलले भने ‘उनीहरुलाई ठाउँ नदिएर अन्य व्यवसायलाई दिनु कतिको न्याय होला ?’

कृषिथोकमा बर्षौदेखि सटर तथा गोदाम बिक्री भइरहेको बताउँदै नागरिकता नभएका भारतीय नागरिकलाई आश्रय दिएको उनीहरुले आरोप लगाएका छन् । समितिका अध्यक्ष कमलबहादुर पौडेलको मिलेमत्तोमा आफुखुसी व्यापारीहरुले संरचनासमेत निर्माण गरिरहेको उनीहरुको आरोप छ । साथै आफुहरुको समस्याको बिषयमा समितिका अध्यक्ष पौडेल जानकार हुँदाहुँदै पनि कुनै ठोस कदम नचालेको तथा आफुहरुको कुरै सुन्न नचाहेको उनीहरुले बताएका छन् । समितिले यसको सहि समाधान नगरे आफुहरु संघर्ष गर्नपनि पछि नपर्ने व्यापारीले बताएका छन् ।

यता कृषि बजार ब्यवस्थापन समितिका अध्यक्ष कमलबहादुर पौडेलले आफु निर्वाचित भएको एक बर्ष मात्र भएको बताउँदै तर, यो समस्या बर्षौदेखिको भएको बताएका छन् । उनले सटर बिक्री गर्न नपाइने बताए । तर, जसको नाममा सटर तथा गोदाम छन् उनीहरुको नातेदार बताएर अन्यले सटर तथा गोदाम चलाएको भन्ने जवाफ आउने गरेकाले समस्या उत्पन्न भएको बताए । ‘समितिले कुनैपनि सटर तथा गोदाम बिक्री गर्न कसैलाई अनुमति दिएको छैन’ अध्यक्ष पौडेलले भने ‘तर सटरबालाको भाई, बुहारी, भतिज, भाञ्जी हौ भनेर पसल सञ्चालन गरिरहेकाले हामीलाई पनि समस्या भएको छ ।’ कृषिथोक बजारमा ३ सय १४ वटा सटर तथा गोदाम रहेको उनले बताएका छन् ।

भिडियो पनि

हाम्रो बारेमा

हाम्रो समूह

सम्पर्क