संखुवासभा । 

संखुवासभाको पाचखपन नगरपालिका–३ का दिपन राईले श्रीमतीको हत्याको आरोपमा पक्राउ परेका छन् । गत पौष ५ गते राती १२ बजेको समयमा राईको २९ बर्षीया श्रीमती बिष्णुमाया राई मृत अवस्थामा रहेको भन्ने जानकारी पाएपछि ईलाका प्रहरी कार्यालय वानाको  प्रहरी टोली गएको थियो ।

घटनास्थलमा भएको अनुसन्धान टोलीले प्रारम्भिक अनुसन्धान गर्ने क्रममा मृतकको शरिरमा केही चोट पटक देखेसँगै घटना बारेमा सुक्ष्म अनुसन्धान थालेको थियो । घटनास्थलको प्रारम्भिक अनुसन्धानसँगै मृतकलाई पोष्टमार्टमको लागि धरान पठाएको थियो । 

अन्य अनुसन्धान जारी नै रहेकोमा बिष्णुमायाको आत्महत्या तथा भवितव्य बाट मृत्यु नभई कर्तब्यबाट हत्या भएको खुल्न आएसँगै मृतककै श्रीमान दिपन राईलाई पक्राउ गरिएको र आफैले हत्या गरेको साबिति बयान दिएको जिल्ला प्रहरी कार्यालय संखुवासभाले जनाएको छ ।

राईले श्रीमतीसँग सामान्य बिषयमा बादबिबाद हुँदा आफ्नो रिशको आवेगलाई थाम्न नसक्दा श्रीमतीको हत्या भएको प्रारम्भिक अनुसन्धानबाट खुल्न आएको प्रहरीले जनाएको छ । श्रीमतीको हत्या आरोपमा पक्राउ परेका राईको बिषयमा थप अनुसन्धान तथा कानूनी कारवाही भईरहेको प्रहरी कार्यालयले जनाएको छ ।