खोटाङ । 

खोटाङ दिक्तेल रुपाकोट मझुवागढी नगरपालिका –३ कांडेका ३३ बर्षीय गिरीराज थापाको हत्यामा संलग्न रहेका उनकै भाई २२ बर्षीय नारायण थापा र भतिजा १५ बर्षीय रुपन थापालाई प्रहरीले  पक्राउ गरेको छ  ।

गत भदौ ९ गते दिउसो ११ बजे घरबाट हिडेका गिरीराज घर नफर्केपछि खोजतलास जारी राखिएको थियो । विहिवार १० गते बिहानको राती पौने २ बजे घरदेखी अन्दाजी २ सय  मिटर बारीमा उनी मृत अबस्थामा फेला परेपछि प्रहरीलाई खबर गरिएको थियो । 

जिल्ला प्रहरी कार्यालय खोटाङको प्रहरी टोलीले  घटनाको प्रकृती हेर्दा हत्या गरेको हुन सक्ने आशंकमा अनुसन्धान थालेको थियो । घटनाको प्रकृति, स्थानियबासीको सोधपुछ तथा अनुसन्धानबाट प्रहरीले हिजै मृतकका भाई नारायण र भतिजा रुपनलाई पक्राउ गरेको हो ।

पक्राउ परेका उनीहरुले घरयासी बिबादका कारण भैसी बाँध्ने प्लाष्टिकको डोरीले घाँटीमा कसेर हत्या गरेको अनुसन्धानमा खुलेपछि उनीहरुलाई कर्तब्य ज्यान मुद्धामा कानुनी कारबाही अगाडी बढाई घटनाको बारेमा थप अनुसन्धान भईरहेको प्रहरीले जनाएको छ ।