गोलधापमा फागुन २१ गते हुने बृहत् जनवादी गीति कार्यक्रमको तयारी पुरा (भिडियोसहित)

गोलधाप।

झापाको बाह्रदशी–५ स्थित गोलधापमा शहिद प्रजापति स्मृति प्रतिष्ठानले फागुन २१ गते आयोजना गर्न लागेको बृहत् जनवादी गीति कार्यक्रमको तयारी पुरा गरेको छ । प्रतिष्ठानले शनिबार (आज) कार्यक्रम स्थलमा पत्रकार सम्मेलन गरेर तयारी पुरा भएको जनाएको हो ।

बरिष्ठ जनवादी गायक राजन राईको उपस्थितिमा सांगितिक कार्यक्रम सञ्चालन गर्ने तयारी भएको आयोजक समितिका अध्यक्ष त्रिलोचन सापकोटाले जानकारी दिएका छन् ।

बामपन्थी पृष्ठभूमिका प्रजापति सापकोटालाई २०४३ सालको तिहारमा जनवादी देउसी भैलो खेल्ने क्रममा पञ्चायती व्यबस्थाका समर्थकले हत्या गरेका थिए । उनकै स्मृतिमा प्रतिष्ठान स्थापना गरेर जनवादी सांगीतिक कार्यक्रम आयोजना गरिएको हो । कार्यक्रममा जनबादी गायक राईको आठ वटा जनवादी गीत साथै स्थानीय कलाकारहरुको प्रस्तुती रहने जनाइएको छ ।

प्रतिस्ठानका अध्यक्ष सापकोटाले प्रचार प्रसारलाई व्यापक बनाएको जानकारी दिए । उनले कार्यक्रममा १० हजार भन्दा बढी दर्शक स्रोता उपस्थित हुने अपेक्षा गरिएको बताए । गणतन्त्र बिरोधी गतिविधि बढ्दै गएको समयमा यो व्यवस्था स्थापनाका लागि ज्यानको आहुति दिएका सापकोटाको योगदानलाई अझ व्यापक बनाउन कार्यक्रम आयोजना गरिएको जानकारी दिए । सोही अवसरमा रक्तदान कार्यक्रम समेत आयोजना गरिने प्रतिस्ठानले जनाएको छ ।

नेकपा एमालेका सचिव योगेश भटराईको प्रमुख आतिथ्यतामा हुने कार्यक्रममा नेकपा माओवादी केन्द्रका केन्द्रीय सदस्य रञ्जित तामाङ, एकीकृत नेकपा समाजवादीका केन्द्रीय सदस्य पुष्प पोखरेललगायतका बनमपन्थी नेताहरुको पनि आतिथ्य रहने जनाइएको छ ।

anil

जनवादी संस्कृतिलाई जनसाधारणले बिर्सिन लागेको अनुभूति भएकाले कार्यक्रम आयोजना गरिएको प्रतिष्ठानका सह–सचिव अनिल सापकोटाले बताए । उनले कार्यक्रम सम्पन्न गर्न ६ लाख रुपैयाँ खर्च हुने अनुमान गरिएको बताए । निशुल्क प्रवेशको व्यवस्था गरिएको कार्यक्रममा स्वेच्छिक रुपमा आर्थिक सहयोग गर्न सकिने छ ।

’शिरैमा मेरो, शिरैको टोपी, ’कान थापेर सुनिदेउ दाजु’ लगायतका कालजयी जनवादी गितका सर्जक राई हुन् । स्थानीय कलाकारहरु अनिल सापकोटा, गोपाल योङहाङ, मेदनी शिवाकोटी, अम्बिका अधिकारीले पनि सांगीतिक प्रस्तुति राख्ने बताइएको छ । कार्यक्रमको पूर्वसन्ध्यामा गोलधाप बजार सरसफाई पनि गरिएको थियो ।

५१ औं सुखानी शहिद दिवसको सम्झनामा आयोजना गरिएको कार्यक्रममा सुखानी हत्याकाण्डका शहिदहरुसहित प्रजापति सापकोटाको प्रतिमामा माल्यपण गरी कार्यक्रम उद्घाटन हुने अध्यक्ष सापकोटाले जानकारी दिए ।

प्रतिष्ठानका अध्यक्ष सापकोटाको अध्यक्षतामा भएको पत्रकार सम्मेलनको सहजीकरण प्रतिष्ठानका सचिव रुद्रप्रसाद सेडाईले गरेका थिए । कार्यक्रममा सहिद प्रजापतिका छोरा बिरेन्द्र सापकोटा, कोषाध्यक्ष कमला सापकोटा, बाह्रदशी गाउँपािलकाका योजना अधिकृत तेजप्रसाद रेग्मी, समाजसेवी बेदराज रेग्मीलगायत स्थानीयको बाक्लो उपस्थिति रहेको थियो ।

हाम्रो बारेमा

हाम्रो समूह

सम्पर्क