बिर्तामोड । 

नेपाल शैक्षिक परामर्श संघ (इक्यान) झापाको अध्यक्षमा राजकुमार कार्की निर्वाचित भएका छन् । झापाको बिर्तामोड शुक्रवार सम्पन्न इक्यान झापाको चौथो अधिवेशन तथा सातौं वार्षिक साधारण सभाले दुई वर्षे कार्यकालका लागि कार्कीलाई सर्वसम्मत रुपमा अध्यक्षमा चयन गरेको हो । 

बिर्तामोड एजुकेशन फाउन्डेशनका सञ्चालक समेत रहेका कार्कीले इक्यान झापाको स्थापनाकालबाटै विभिन्न जिम्मेवारीमा रहेर काम गरिसकेका छन् । उनी कोषध्यक्ष, सचिव, उपाध्यक्ष हुँदै अध्यक्ष बनेका हुन् ।

त्यस्तै समितिको आईपीपीमा निर्वतमान अध्यक्ष रोशन सुवेदी रहेका छन् । समितिको उपाध्यक्षमा अशोक भण्डारी चयन भएका छन् । बिर्तामोडस्थित बिज इन्टरनेश्नल  एजुकेशन सर्भिसका सञ्चालक समेत रहेका भण्डारीले यसअघि सचिव, कोषध्यक्ष र सदस्यको जिम्मेवारी कुशलता पूर्वक सम्पन्न गरिसकेका छन् ।

त्यस्तै संस्थाको सचिवमा विशाल सिटौला चयन भएका छन् । समितिको कोषध्यक्षमा तुलसी पाठक  सर्वसम्मत रुपमा निर्वाचित भएका हुन् । समितिको सदस्यहरुमा सरोश खरेल नविन बोहोरा, मोहन पराजुली र निशा दुलाल सर्वसम्मत चयन भएका हुन् । शैक्षिक परामर्शको क्षेत्रमा काम गर्दै आएको नेपाल शैक्षिक परामर्श संघमा ५० बढी सदस्यहरु रहेका छन् । संस्थाको संस्थापक अध्यक्षका रुपमा सुमन शर्मा जमरकट्टेल रहेका छन् ।

नेपाल शैक्षिक परामर्श संघका केन्द्रिय अध्यक्ष शेषराज भट्टराईको प्रमुख आतिथ्यमा इक्यान झापाको चौथो अधिवेशन सम्पन्न भएको हो । नवनिर्वाचित समितिले श्क्रबार सपथ ग्रहण गर्दै दुई वर्षे कार्यकालको शुरुवात गरेको छ ।