झापाकै नमूना संस्थागत बिद्यालय न्यूटन्स एजुकेशन एकेडेमी

झापा ।

झापाको बिर्तामोडको न्यूटन्स एजुकेशन एकेडेमीकी अवकाश प्राप्त गरेकी शिक्षक मिनु शिवाकोटीले २० लाख भन्दा बढी रकम पाएकी छिन् । २१ वर्ष सेवा गरेर स्वेच्छिक अवकाश लिएकी शिक्षिका शिवाकोटीले सो रकम प्राप्त गरेकी हुन् ।

शिवाकोटीले अवकाश कोषबाट साढे ८ महिनाको तलब ३ लाख ४७ हजार ६५०, नागरिक लगानी कोषबाट ८ लाख ३५ हजार १८४, कर्मचारी संचय कोषबाट ७ लाख ५२ हजार र शिक्षक कल्याण कोषबाट ५१ हजार १०८ रुपैयाँ गरी जम्मा २०लाख ८ हजार २२१ रुपैयाँ पाएकी हुन् ।

न्यूटन्सकै अर्का शिक्षक आइन्द्र सुब्बाले पनि दुई वर्षअघि अवकाश लिँदा साढे १० लाख रुपैयाँ पाएका थिए । शिक्षासेवी हरिकुमार प्रसाई संस्थापक रहेको न्यूटन्स एजुकेशन एकेडेमीले आफ्नो ऊर्जाशील समय बिताएर अवकाश हुने शिक्षकहरुले खाली हात जान नपरोस् भनेर विभिन्न कोषहरुको व्यवस्था गरेको हो । कर्मचारी संचय कोष, नागरिक कल्याण कोष, शिक्षक कल्याण कोष र अवकाश कोषबाट प्राप्त हुने रकमले सामुदायिक विद्यालयका सरह न्यूटन्सका शिक्षकहरु आकर्षक रकम लिएर विदा हुने गरेका छन् ।

२०६० सालमा १५० जना विद्यार्थीबाट न्यूटन्स एजुकेशन एकेडेमी स्थापना भएको थियो । शुरुवाती समयमा केही अप्ठ्यारो भएपनि २०६५ सालदेखि संस्थापक हरिकुमार प्रसाईले विद्यालयका तर्फबाट संचय कोषको व्यवस्था गरेका थिए । त्यस्तै विद्यालयले कमाएको मुनाफाको केही प्रतिशत रकमबाट प्रसाईले अवकाश कोषको स्थापना गरेका थिए । सोही कोषमा प्रसाईले आफ्नो दुई वर्षको तलब सहयोग गरेका थिए ।

संस्थागत विद्यालयका शिक्षकको तलब भत्ता सामुदायिक विद्यालयका शिक्षक सरह अनिवार्य व्यवस्था गर्नुपर्ने माग हुँदै आएको छ । संस्थागत विद्यालयमा काम गर्ने शिक्षक कर्मचारीको रेकर्ड अद्यावधिक राख्नु पर्ने र सबै शिक्षक–कर्मचारीका लागि सामाजिक सुरक्षा कोषको व्यवस्था गर्नुपर्ने माग हुँदै आएको हो ।

संस्थागत विद्यालय शिक्षक युनियन (इस्टु) विभिन्न माग राखी आन्दोलित रहेको छ । शैक्षिक अगुवा रहेका हरिकुमार प्रसाईले तलदेखिका शिक्षकहरुको मर्मलाई बुझेर चार वटा कोषको व्यवस्था गरेको न्यूटन्सका प्रिन्सिपल देवेन्द्र हुमागाँईले जानकारी दिए । उनले यस किसिमको व्यवस्थाले अन्तिम अवकाश लिने शिक्षकहरुलाई थारै भएपनि राहत मिलेको बताए ।

न्यूटन्सले यी कोषबाहेक शिक्षकहरुलाई पढाई खर्च, सुत्केरी खर्चलगायतका सुविधा पनि दिँदै आएको छ । न्यूटन्समा १६२ जना शिक्षक कर्मचारी कार्यरत रहेका छन् । त्यसमध्ये ५२ जना स्थायी हुन् । ४ वर्ष सेवा अवधि पूरा गरेपछि स्थायी नियुक्ति दिने गरिएको छ । राम्रो सेवा सुविधा भएकै कारण न्यूटन्सप्रति शिक्षक कर्मचारीहरु आकर्षित भएको बताइन्छ ।

हाम्रो बारेमा

हाम्रो समूह

सम्पर्क