सुरुङ्गा ।  

एन  प्याब्सन झापाको  जिल्ला स्तरीय फुटबल प्रतियोगिता झापाको कनकाई नगरपालिकास्थित जामुनखाडी खेलमैदानमा सोमबारबाट शुरु भएको छ । 

 राष्ट्रिय निजी तथा आवासीय विद्यालय एसोसिएसन नेपाल (एनप्याब्सन) झापाको १३ औं जिल्लास्तरीय खेलकुद तथा सांस्कृतिक कार्यक्रम शुरु भएको हो  । विभिन्न खेल प्रतियोगिता तथा सास्कृतिक कार्यक्रमहरुको आयोजना गरिदै आएकोमा सोमवार सुरुङ्गामा फुटबल खेलबाट ६ दिवशीय प्रतियोगिताको जिल्ला शिक्षा समन्वय समितिका प्रमुख देवेन्द्र मल्लले गरेका थिए । प्रतियोगिताको समापन भने दमकस्थित झापा मोडल स्कुलमा हुनेछ । 

प्रतियोगिता माघ १४ गतेदेखि १९ गतेसम्म हुनेछ । कार्यक्रममा जिल्ला शिक्षा  समन्वय समिति झापाका प्रमुख  मल्ल, एनप्याब्सनका केन्द्रिय उपाध्यक्ष  जयबहादुर श्रेष्ठ, एनप्याब्सन झापाका कार्यवाहक अध्यक्ष ओमबिक्रम नेम्वाङलगायतले आ–आफ्नो धारणा राखेका थिए । 

जिल्लास्तरीय खेलकुद तथा सांस्कृतिक कार्यक्रम अन्तरगत भलिबल, टेनिस, ब्याडमिन्ट लगायत खेलकुद प्रतियोगिता जिल्लाका विभिन्न स्थानमा हुनेछ भने सांस्कृतिक तथा आधुनिक नृत्य प्रतियोगिता समेत हुनेछ । 

एनप्याब्सन झापा उपाध्यक्ष मोहन आचार्यले स्वागत गरेको कार्यक्रमको सञ्चालन कार्यक्रमको सञ्चालन सचिव भगिरथ राईले गरेका थिए । उद्घाटन खेल इष्ट होराइजन मेचीनगर र मर्निङ ग्लोरी कनकाई बीच भएको थियो । उदघाटन खेलमा इष्ट होराइजन विजयी भएको छ । यसैविच प्रतियोगिता सुरु हुनुपुर्व एन प्याब्सनमा आवद्ध झापाका सबै विद्यालयका विद्यार्थीहरुले मार्चपास गरेका थिए ।