झापा ।

 झापाको पालिकाका प्रमुखहरुले सपथ ग्रहण गरेका छन् । झापा जिल्ला अदालतमा झापामा रहेका १५ स्थानीय तह मध्ये ११ पालिकाका प्रमुखहरुले आज (सोमवार) सपथ ग्रहण गरेका हुन् ।

 कार्यक्रममा निर्वाचित पालिकाका मेयर तथा अध्यक्षहरुलाई मुख्य निर्वाचन अधिकृत गिरिराज गौतमले सपथ ग्रहण गराएका छन् ।

सपथ ग्रहण गर्ने प्रमुखहरुमा विर्तामोडकी पवित्रा महतरा प्रसाई, कनकाईका राजेन्द्रकुमार पोखरेल, अर्जुनधाराका बलदेव गोम्देन, हल्दिबारीका रविन्द्रप्रसाद लिङ्देन, दमकका राम थापा, भद्रपुरका गणेश पोखरेल, शिवसताक्षीका मेघाहाङ थोप्रा, बुद्धशान्ति गाउँपालिकाका मनोज प्रसाई, बाह्रदशीका देवेन्द्र चौलागाई, कचनकवलका कालिन्द्रसिंह राजवंशी र झापा गाउँपालिकाका जयनारायण शाह रहेका छन् ।

बाँकी रहेका गौरीगञ्ज, कमल गाउँपालिका, गौरादह, मेचीनगर नगरपालिकाका प्रमुखहरुलाई केही दिनपछि सपथ ग्रहण गराइने जनाइएको छ । गत बैशाख ३० गते भएको स्थानीय तहको निर्वाचनमा निर्वाचित पालिका प्रमुखहरुलाई सपथ ग्रहण गराइएको हो ।