मेचीनगर । 

मेचीनगर–९ थोप्लेविरानमा सञ्चालित नैनाखाल बचत समूहको १२ औँ वार्षिक साधारण सभा शनिबार सम्पन्न भएको छ । बचत समूहका अध्यक्ष रुद्रप्रसाद फुयलको अध्यक्षतामा सम्पन्न सभाले ऋण लगानी बढाउने प्रस्ताव सर्वसम्मत रुपमा पारित गरेको छ । यस्तै, शेयर सदस्यलाई अध्ययन भ्रमण गराउने निर्णय पनि गरेको छ ।

साधारण सभामा समूहका सल्लाहकार समितिका संयोजक हरि चापागाईं, जेष्ठ नागरिक तथा सल्लाहकार जयप्रसाद बाँस्तोला, समूहका कोषाध्यक्ष विष्णुकान्त बाँस्तोला, जन–संसद् दैनिकका सम्पादक झुलन रेग्मी, अग्निप्रसाद दनुवार लगायतले शुभकामना मन्तव्य राखेका थिए ।

समूहकी उपाध्यक्ष जया रोक्काले स्वागत मन्तव्य राखेको कार्यक्रमको सञ्चालन सहसचिव खेमकुमारी कार्कीले गरेकी थिइन् । समूहको वार्षिक आयव्यय विवरण सचिव एकराज नेपालले प्रस्तुत गरेका थिए ।

१२ वर्ष अघि स्थापना भएको उक्त बचत समूहमा ४२ जना बढी सदस्य आबद्ध छन् । मासिक रुपमा प्रतिसदस्य २ सय रुपैयाँ बचत गरिँदै आएको छ । ‘गाउँमा बचत गाउँमै लगानी’को अवधारणा अनुसार उक्त समूह सञ्चालित छ ।